महोत्तरी– महोत्तरी जिल्लाको गौशालामा नेपाल प्रहरीले ९ राउण्ड हवाई फायर १३ राउण्ड अश्रुग्यास प्रहार गरेको छ।
गौशाला नगरपालिका–४ स्थित मल्हिनियाँमा आज स्थानीयले ढुंगामुढा गरेर प्रहरीलाई घाइते बनाएपछि अश्रुग्यास र हवाई फायर गरिएको जिल्ला प्रहरी कार्यालय महोत्तरीले जनाएको छ ।
प्रहरी प्रवक्ता डीएसपी दिलीपकुमार गिरीका अनुसार इलाका प्रहरी कार्यालय गौशालाका प्रहरी निरीक्षक मनोजकुमार यादव र सशस्त्र प्रहरी वेस क्याम्पका प्रहरी निरीक्षक शंकर थापा घाइते भएका छन् । अश्रुग्यास र हवाई फायर गरी अहिले अवस्था सामान्य बनाइएको प्रवक्ता गिरीले बताए ।
केही दिनअघि विष सेवनबाट मृत्यु भएकी स्थानीय आरती शाहलाई परिवारका सदस्यले हत्या गरेको आरोप लगाउँदै दोषीलाई कारबाहीको माग गर्दै स्थानीय महिला सञ्जालले आन्दोलन गरिरहेको छ ।
प्रहरीले घटनाका मुख्य आरोपी मृतकका श्रीमान् उमेश साहलाई नियन्त्रणमा लिएर अनुसन्धान प्रक्रिया अगाडि बढाए पनि पीडित मृतककी माइती पक्ष र स्थानीय महिला सञ्जालले कारबाहीको माग गर्दै आज बिहानैदेखि आन्दोलन गरेका हुन् ।
