काठमाडौं–काठमाडौं महानगरपालिकाले पुरानो बसपार्क क्षेत्रमा फुटपाथ मिचेर बनाएका संरचना हटाएको छ । 

मंगलबार महानगरले फुटपाथ क्षेत्र खाली गर्न डोजर लगाएर अनाधिकृत संरचना हटाएको हो । त्यस क्रममा महानगरले त्यहाँ रहेको अस्थायी प्रहरी बिट समेत भत्काएको छ । महानगरपालिकाले काठमाडौंको भ्युटावर नजिक रहेको पुरानो बसपार्कमस्थित सडकपेटीको प्रहरी बिट हटाएको हो ।  

फुटपाथ क्षेत्रलाई खाली गर्ने महानगरको नियमित कार्य अन्तर्गत त्यस क्षेत्रको सडक पेटीमा रहेको संरचना हटाएको महानगरले जनाएको छ ।

महानगरपालिकाले सडक पेटीमा रहेको प्रहरी बिट हटाउने योजनाअनुसार काम अघि बढाएको हो । पुरानो बसपार्क क्षेत्रमा रहेको बिटले सडक र पेटीमा असर गरेकाले समस्या परेको भन्दै प्रहरी बिट हटाएको महानगरपालिकाले जनाएको छ ।