काठमाडौँ– राष्ट्रिय स्वतन्त्र पार्टी (रास्वपा) का सभापति तथा सांसद रवि लामिछानेले एमाले सांसद लक्ष्मी कोइरी विरामी नपरेको बताएका छन् ।
आज प्रतिनिधि सभामा बोल्दै लामिछानेले सांसद कोइरीको विषय आफूसँग पनि जोडिएको भन्दै सो सम्बन्धी आफ्नो धारणा राखेका हुन् । आफू गृहमन्त्री भएको बेलामा सांसद कोइरीलाई प्रहरी प्रशासनले खोजेको भएपनि उनी भागेर भारत गरएको र त्यसको प्रमाण आफूसँग रहेको लामिछानेले बताए ।
‘लक्ष्मी कोइरी विरामी परेका छैनन्, उनी विरामी होइनन्, फरार अभियुक्त हुन् । उनका विषयमा नढाटियोस्,’ लामिछानेले भने ।
सभामुख देवराज घिमिरेले सांसद कोइरी विरामी परेकोले संसदमा उपस्थित हुन नसकेको सुचना संसदलाई दिएका थिए । कोइरीमाथि हत्या अभियोग गरेको छ । सांसद कोइरी एमालेबाट निर्वाचित भएका हुन् भने सभामुख घिमिरे पनि एमाले नेता नै हुन् । यद्यपि, सभामुख भएपछि उनले पार्टीका सबै जिम्मेवारीबाट राजीनामा दिएका छन् ।
