काठमाडौँ – एसिसी प्रिमियर कपक्रिकेटमा अपराजित रहँदै सेमिफाइनलमा पुगेको नेपालले फाइनल प्रवेशका लागि आज कुवेतसँग खेल्दैछ ।
उक्त खेल कीर्तिपुरस्थित त्रिभुवन विश्वविद्यालयको मैदानमा बिहान ९ बजे सुरु हुनेछ ।
नेपाल समूह ‘ए’को विजेताको रूपमा सेमिफाइनलमा पुगेको हो । नेपालले ४ खेलमा ३ मा जित निकालेको थियो । साउदी अरेबियाविरुद्धको खेल पानी परेका कारण अनिर्णीत हुँदा नेपालले १ अंक पाएको थियो ।
नेपाल ७ अंकका साथ सेमिफाइनलमा पुगेको हो । अर्कोतिर कुवेत समूह बीको उपविजेताको रूपमा सेमिफाइनलमा पुगेको हो ।
नेपाल आजको खेल जित्दै फाइनलमा पुग्ने लक्ष्यमा छ ।
यसैगरी, आजै अर्को सेमिफाइनल खेल पनि हुनेछ । मुलपानी मैदानमा हुने अर्को सेमिफाइनल खेलमा समूह ‘ए’को उपविजेता ओमान र समूह ‘बी’को विजेता युएईबीच प्रतिस्पर्धा हुँदैछ ।
जारी प्रतियोगिता विजेता टोलीले आगामी सेप्टेम्बरमा हुने एसिया कपमा भारत र पाकिस्तानजस्ता ठूला टोलीसँग खेल्नेछन् ।
