काठमाडौँ– इन्डियन प्रिमियर लिग (आइपिएल)मा कीर्तिमानी स्कोर बनाएको लखनऊ सुपर जायन्ट्सले पन्जाब किंग्सलाई फराकिलो जित निकालेको छ ।
गएराति भएको खेलमा लखनाऊले घरेलु टोली पञ्जाबमाथि ५६ रनको फराकिलो जित निकालेको हो ।
यस क्रममा लखनाऊले प्रतियोगिताकै इतिहासमा दोस्रो ठूलो कीर्तिमानी स्कोर खडा गरेको छ ।
लखनऊले ५ विकेटको क्षतिमा २५७ रन बनाएको हो । कुनै पनि टिमले २५० रनमाथिको स्कोर बनाएको यो दोस्रो पल्ट मात्र हो ।
अस्ट्रेलियाका मार्कस स्टोइनसको ४० बलमा ७० रन तथा वेस्ट इन्डिजका केली मायर्सको २४ बलमा ५४ रनको मद्दतले लखनाऊले ठूलो स्कोर खडा गरेको हो ।
यसअघि प्रतियोगिताकै सबैभन्दा ठूलो स्कोर २६३ रन रहेको छ । यो सन् २०१३ मा रोयल च्यालेन्जर्स बेंगलोरले पुने वारियर्सविरुद्ध बनाएको थियो ।
जवाफी ब्याटिङमा आएको पञ्जाबले १९.५ ओभरमा अलआउट हुँदै २०१ रन बनायो ।
लखनाऊका स्टोइनसले एक विकेट लिए । अलराउण्ड प्रदर्शन गरेका उनी ‘प्लेयर अफ द म्याच’ भए ।
आठ खेलमा १० अंक जोडेको लखनाऊ लिगको दोस्रो स्थानमा छ । पराजित पञ्जाब छैटौँ स्थानमा छ ।
