काठमाडौँ– एसिसी प्रिमियर कप क्रिकेटमा अपराजित रहँदै फाइनलमा पुगेको घरेलु टोली नेपालले उपाधिका लागि आज युएईसँग खेल्दैछ ।

आज युएईलाई हराए नेपालले आगामी सेप्टेम्बरमा हुने एसिया कपमा भारत र पाकिस्तानजस्ता ठूला टोलीसँग खेल्नेछ । यसर्थ, यो खेल नेपाली क्रिकेट इतिहासकै लागि महत्वपूर्ण छ । 

खेल कीर्तिपुरस्थित त्रिभुवन विश्वविद्यालयको मैदानमा बिहान ९ बजे सुरु हुनेछ ।

घरेलु टोली नेपाल समूह ‘ए’को विजेताको रूपमा सेमिफाइनलमा पुगेको थियो । सेमिफाइनलमा कुवेतविरुद्ध उत्कृष्ट प्रदर्शन गरेर जितनजिक पुगेको अवस्थामा वर्षाका कारण खेल रद्द भएपछि नेपाल फाइनलमा पुगेको हो ।

नेपालले जारी खेलमा अपराजित छ । नेपालले ४ खेलमा ३ मा जित निकालेको थियो । साउदी अरेबियाविरुद्धको खेल पनि पानी परेका कारण अनिर्णीत हुँदा नेपालले १ अंक पाएको थियो । 

यद्यपि, आज पनि पानी परेर खेल हुन नसक्ने चिन्ता छ । वर्षाले खेल हुन नसके सुपर ओभरमा जाने बताइएको छ ।