काठमाडौँ– एसिया कप क्रिकेटमा छनोट हुन युएईविरुद्ध आज अन्तिम खेल खेलिरहेको नेपालले टस जितेर पहिला फिल्डिङ गर्ने भएको छ ।
कीर्तिपुरस्थित त्रिवि क्रिकेट मैदानमा घरेलु टोली नेपालका कप्तान रोहित पौडेलले टस जितेर पहिला फिल्डिङ गर्ने निर्णय लिएका छन् ।
नेपालले आज टोलीमा एक परिवर्तन गरेको छ । दीपेन्द्रसिंह ऐरीको स्थानमा गुलशन झालाई मौका दिएको छ ।
खेल बिहान ९ बजे सुरु हुनेछ ।
यस्तो छ नेपालको प्लेइङ ११ :
आसिफ शेख (विकेटकिपर), कुशल भुर्तेल, भीम सार्की, रोहित पौडेल (कप्तान), कुशल मल्ल, आरिफ शेख, गुलशन झा, सोमपाल कामी, करण केसी, सन्दीप लामिछाने र ललित राजबंशी ।
एसिसी प्रिमियर कप क्रिकेटमा नेपाल अपराजित रहँदै फाइनलमा पुगेको हो ।
आज युएईलाई हराए नेपालले आगामी सेप्टेम्बरमा हुने एसिया कपमा भारत र पाकिस्तानजस्ता ठूला टोलीसँग खेल्नेछ । यसर्थ, यो खेल नेपाली क्रिकेट इतिहासकै लागि महत्वपूर्ण छ ।
घरेलु टोली नेपाल समूह ‘ए’को विजेताको रूपमा सेमिफाइनलमा पुगेको थियो । सेमिफाइनलमा कुवेतविरुद्ध उत्कृष्ट प्रदर्शन गरेर जितनजिक पुगेको अवस्थामा वर्षाका कारण खेल रद्द भएपछि नेपाल फाइनलमा पुगेको हो ।
नेपालले जारी खेलमा अपराजित छ । नेपालले ४ खेलमा ३ मा जित निकालेको थियो । साउदी अरेबियाविरुद्धको खेल पनि पानी परेका कारण अनिर्णीत हुँदा नेपालले १ अंक पाएको थियो ।
आजको खेलमा पनि वर्षा भए पहिले फिल्डिङ गर्ने टोलीलाई फाइदा पुग्ने देखिन्छ ।
