काठमाडौं– एसीसी प्रिमियर कपको फाइनलमा युनाइटेड अरब इमिरेट्स (यूएई) लाई सात विकेटले पराजित गर्दै नेपाल यसै वर्ष हुने एसिया कपमा स्थान बनाउन सफल भएको छ ।
मंगलबार कीर्तिपुरस्थित त्रिवि क्रिकेट मैदानमा भएको फाइनल खेलमा नेपालले प्रिमियर कपको उपाधिसहित पहिलो पटक एसिया कपमा स्थान बनाएको हो ।
प्रिमियर कपको उपाधि जितेसँगै नेपालले यसै वर्षको सेप्टेम्बरमा पाकिस्तानमा हुने तालिका रहेको एसिया कपमा समूह ‘ए’ मा स्थान पक्का गरेको हो । ६ टिमको सहभागिता रहने प्रतियोगिताको यो समूहमा भारत र पाकिस्तान छ ।
यूएईले प्रस्तुत गरेको ११८ रनको लक्ष्य नेपालले ३३.३ ओभरमा तीन विकेट गुमाएर पूरा गरेको हो । त्यसअघि टस हारेपछि ब्याटिङमा आएको यूएईले ३३.१ ओभरमा सबै विकेट गुमाएर ११७ रन बनाएको थियो ।
नेपालको जितमा त्रिवि क्रिकेट मैदानमा उपस्थित दर्शकले रंग र अविर उडाएर हर्षोल्लास मनाएका छन् ।
सोमबार पानी पर्दा पनि छाता ओढेर नेपाली टोलीको हौसला बढाउन पुगेका उनीहरु मंगलबार पनि उत्तिकै संख्यामा स्टेडियम वरपर उपस्थित भएर नेपाली खेलाडीको मनोबल बढाएका हुन् ।
