काठमाडौँ– भारतमा जारी इन्डियन प्रिमियर लिग (आइपिएल) क्रिकेट प्रतियोगिताको अंक तालिकामा पुछारमा रहेको दिल्ली क्यापिटल्स्ले शीर्ष स्थानको गुजरात टाइटन्सलाई उसको घरेलु मैदानमै हराएको छ ।
गुजरातको घरेलु मैदान नरेन्द्र मोदी रंगशालामा गएराति भएको खेलमा पुछारमा रहेको दिल्लीले शीर्ष स्थानको गुजरातमाथि ५ रनको रोमाञ्चक जित हात पारेको हो ।
लो स्कोरिङ थ्रीलर खेलमा दिल्लीले १३० रनको सामान्य लक्ष्य रक्षा गर्न सकेको हो ।
दिल्लीले दिएको १३१ रनको लक्ष्य पछ्याएको साविक विजेता गुजरात लक्ष्यमा पुग्न सकेन । कप्तान हार्किद पाण्ड्याले अर्धशतक बनाए पनि त्यो टोलीको जितका लागि पर्याप्त भएन ।
गुजरातले निर्धारित २० ओभरमा ६ विकेट गुमाएर १२५ रन मात्र बनाउन सक्यो । कप्तान पाण्ड्याले ५३ बल खेल्दै ७ चौका प्रहार गरी अविजित रहँदै सर्वाधिक ५९ रन बनाए ।
दिल्लीका खलिल अहमद र इशान्त शर्माले २÷२ तथा एनरिक नोर्किअ र कुलदिप यादवले समान १ विकेट लिए ।
त्यसअघि टस जितेर पहिले ब्याटिङ गरेको दिल्लीले निर्धारित २० ओभरमा ८ विकेट गुमाएर १३० रन बनाएको थियो ।
अमन हाकिम खानले अर्धशतक प्रहार गरेका थिए । उनले ४४ बल खेल्दै ३ चौका ३ छक्का प्रहार गरी ५१ रन बनाए ।
गुजरातका मोहम्मद शामीले सर्वाधिक ४ विकेट लिए ।
जारी प्रतियोगितामा ९ खेल खेल्दा दिल्लीको यो तेस्रो जित निकालेको हो ।
अर्कोतिर शीर्ष स्थानको गुजरातको तेस्रो हार हो । हारपछि पनि ९ खेलबाट १२ अंकसहित गुजरात शीर्ष स्थानमै कायम छ ।
कोलकाता नाइट राइडर्स र सनराइजर्स हैदरवादको समान ६ अंक छ । यद्यपि, रनरेटका आधारमा दिलली अझे पुछारमै छ ।
