काठमाडौँ– साविक विजेता म्यानचेस्टर सिटीलाई पछि पार्दै आर्सनल फेरि इंग्लिस प्रिमियर लिग फुटबल प्रतियोगिताको शीर्ष स्थानमा फर्किएको छ ।
गएराति घरेलु मैदानमा चेल्सीमाथि ३–१ को जित निकाल्दै आर्सनल शीर्ष स्थानमा फर्किएको हो ।
आर्सनल पछिल्लो चार खेलमा जितविहीन थियो । आर्सनलले गत साता सिटीलाई नतिजा सुम्पिएसँगै शीर्ष स्थान गुमाएको थियो ।
यसले गर्दा दोस्रो स्थानको सिटीले उसलाई उछिन्दै शीर्ष स्थान कब्जा गरेको थियो । एकसाता नबित्दै आर्सनल फेरि शीर्ष स्थानमा फर्किएको हो ।
आर्सनलको जितमा कप्तान मार्टिन ओडीगार्डको दुई गोल गरे भने ग्याब्रियल जिससको नाममा एक गोल रह्यो । नोनी माडुकीले चेल्सीका लागि सान्त्वना गोल फर्काए ।
३४ खेलमा ७८ अंक जोडेको आर्सनल शीर्ष स्थानमा फर्किएको हो । यो दोस्रो स्थानको सिटीभन्दा मात्र २ अंक बढी हो ।
यद्यपि, सिटीले आर्सनलको भन्दा दुई खेल कम खेलेको छ । आज हुने खेलमा सिटीले वेस्टह्यामलाई हराएमा आर्सनल दोस्रो फेरि स्थानमा झर्नेछ ।
पछिल्लो समय लयमा नदेखिएको चेल्सी भने ३३ खेलमा ३९ अंकसहित १२औं स्थानमा छ ।
