काठमाडौं–पर्यटकीय सहर गोवामा भारतका विदेशमन्त्री एस जयशंकरले चीन र रुसका समकक्षीसँग भेटवार्ता गरेका छन् ।
भेटका क्रममा चिनियाँ विदेशमन्त्री छिन ग्याङसँग द्विपक्षीय सम्बन्धका बारेमा विस्तृत छलफल भएको जयशंकरले बताएका छन् ।
भेटपछि ट्विट गर्दै उनले लेखेका छन्, ‘अवरोधित मुद्दाहरू समाधान गर्न र सीमा क्षेत्रमा शान्ति सुरक्षा सुनिश्चित गर्नमा ध्यानकेन्द्रित रहेको थियो ।’
पछिल्ला वर्षमा भारत र चीनबीच पूर्वी लद्दाख क्षेत्रमा सीमा विवाद चर्किएको छ । गएको हप्ता दुई देशका रक्षामन्त्रीहरूबीचको बैठकमा भारतले चीनलाई द्विपक्षीय सम्झौताको उल्लंघन गरेर सम्बन्ध बिगारेको आरोप लगाएका थियो । चीनले भने सीमाको अवस्था समग्रमा स्थिर रहेको जनाएको थियो ।
३ वर्षअघि लद्दाखमा भएको झडपमा २० भारतीय र चार चिनियाँ सैनिकको मृत्यु भएको थियो ।
जयशंकरले रुसी विदेशमन्त्री सर्गेई लाभरोभसँग द्विपक्षीय, विश्वव्यापी र बहुपक्षीय सहयोगका विषयमा विस्तृत समीक्षा गरिएको बताए । शीतयुद्धका बेलाको निकट सहयोगी मस्कोसँग नयाँ दिल्लीको सम्बन्ध बलियो छ ।
भारतले युक्रेनमा रुसी आक्रमणको विरोध गरेको छैन । रुसी तेल बिक्री घटाएर मस्कोको राजस्व घटाउने पश्चिमी प्रयास जारी छ । यही बेला भारत रुसको सबैभन्दा ठूलो कच्चा तेल खरिदकर्ता बनेको छ ।
