काठमाडौं– पाकिस्तान भ्रमणमा रहेको न्युजिल्यान्डले शुक्रबार घरेलु टिमविरुद्ध चौथो एकदिवसीय अन्तर्राष्ट्रिय क्रिकेट खेल्दै छ । कराँचीमा नेपाली समयअनुसार ४ः १५ बजे हुने खेलमा भ्रमणकारी टिम पहिलो जितको खोजीमा हुनेछ ।
सुरुआती तीन खेलमा जित निकाल्दै घरेलु टिमले दुई खेल अगावै शृंखला आफ्नो पक्षमा पारिसकेको छ ।
बुधबार कराँचीमै भएको तेस्रो एकदिवसीयमा पाकिस्तानले २६ रनको जित निकालेको थियो । त्यसअघि रावलपिन्डीमा भएको दोस्रो र पहिलो एकदिवसीय अन्तर्राष्ट्रियमा पाकिस्तान क्रमशः सात विकेट र पाँच विकेटले विजयी भएको थियो ।
एकदिवसीय शृंखलाअघि भएको ट्वान्टी २० अन्तर्राष्ट्रिय शृंखला २–२ को बराबरीमा सकिएको थियो । अन्तिम ट्वान्टी २० असिनापानीका कारण हुन नसकेपछि ट्वान्टी २० बराबरीमा टुङ्गिएको थियो ।
न्युजिल्यान्ड यो खेलपछि आइतबार पाँचौं तथा अन्तिम एकदिवसीय खेलेर स्वदेश फर्किने छ ।
