पोखरा–नेपाली संगीत क्षेत्रमा सबैभन्दा ठूलो धनराशिको ‘अम्बर गुरुङ संगीत पुरस्कार’ किरण खरेललाई प्रदान गरिएको छ ।
गण्डकी प्रदेश प्रमुख पृथ्वीमान गुरुङले शनिबार पोखरामा खरेललाई उक्त पुरस्कार प्रदान गरे ।
पोखरेली युवा सांस्कृतिक परिवारले हङकङमा परिवारका संस्थापकमध्येका एक विक्रम गुरुङको अगुवाइमा आयोजित कार्यक्रमबाट संकलित रकमलाई कोष बनाई पुरस्कार सुरु गरेको हो ।
परिवारका अध्यक्ष उपेन्द्र पौडेलका अनुसार ५ लाखबाट सुरु कोषमा अहिले १८ लाख रुपैयाँ जम्मा भइसकेको छ ।
नेपाली सांगीतिक क्षेत्रमा गायक, संगीतकार र रचनाकार रुपका त्रिवेणी अम्बर गुरुङको सम्मान र स्मृतिमा पुरस्कार स्थापना गरेको परिवारका संस्थापकमध्येका एक कवि तीर्थ श्रेष्ठले बताए ।
पहिलो पटक खरेललाई पुरस्कार प्रदान गरिएको हो । कवि श्रेष्ठले खरेलका गीतबाट नेपाली सुगम संगीतको नयाँ आयाम सुरु भएको र उनको लेखनी एउटा कोसेढुंगा भएको बताए ।
पुरस्कृत खरेलले पुरस्कारलाई अम्बर गुरुङको सुकिलो योगदानको चम्किलो सम्मानको संज्ञा दिए । ७ सय हाराहारी गीत लेखेका ८५ वर्षे खरेलको ‘ए दूरका सितारा’ गीति संग्रह पनि शनिबारै पोखरामा लोकार्पण गरिएको छ ।
चलचित्र माइतीघरका लागि खरेलले लेखेको ‘यो हो मेरो प्यारो माइतीघर...’ गीत निकै चर्चित छ । उक्त गीतको सुटिङ पोखरामै भएको थियो । खरेलका नमान लाज यसरी, वनमा फूल्यो फूल, मन्दिरमा छ कि मूर्तिमा माया लगायत गीत चर्चित छन् ।
