काठमाडौं –एमाले अध्यक्ष केपी शर्मा ओलीले नेपाली नागरिकलाई नक्कली शरणार्थी बनाएर अमेरिका पठाउने ठगी धन्दामा सरकारको अनुसन्धान पद्दतिको निष्पक्षतामाथि प्रश्न उठेको दाबी गरेका छन् ।

एमाले संसदीय दलको बैठकमा आइतबार बोल्दै एमाले अध्यक्ष ओलीले यस प्रकरणमा सरकारको अनुसन्धान प्रक्रिया निष्पक्ष नरहेको दाबी गरे ।

भ्रष्टाचार र ठगीजस्ता आपराधिक कार्यमा संलग्न जोसुकै भए पनि कारबाही हुनुपर्ने बताउँदै ओलीले तर त्यसो गर्दा राजनीतिक प्रतिशोध साँध्न नहुने उल्लेख गरे । 

‘भ्रष्टाचारजन्य क्रियाकलापमा संलग्नलाई जोगाउनु पर्छ भन्ने पक्षमा एमाले छैन’, ओलीले दलको बैठकमा भने, ‘तर अनुसन्धान निष्पक्ष र विश्वासिलो हुनु पर्छ, कसैलाई जोगाउने र कसैलाई फसाउने नाममा अघि बढिन्छ भने त्यो सह्य हुँदैन ।’

एमालेकै शीर्ष नेताहरू जोडिएको नक्कली शरणार्थी प्रकरणलाई सरकारले राजनीतिक रंग दिन खोजेको पनि उनले दाबी गरे ।

‘यस प्रकरणको अनुसन्धानका नाममा सरकारले राजनीतिक प्रतिशोध साँध्न खोजेको देखिएको छ’, उनले भने । 

ओलीले देशमा अस्थिरताको कारण सरकार र सरकारमा रहेका सत्तारुढ दल भएको आरोप लगाए । सत्तारुढ दलहरू केवल सरकार परिवर्तनको खेलमा मात्र लागेको र विकास निर्माणको काम केही पनि गर्न नसकेको उनको आरोप छ ।

१०–१० वटा पार्टी मिलेर पनि सरकार बनाउन नसकेको भन्दै ओलीले व्यङ्ग्यसमेत गरे । ‘अझै सरकारले पूर्णता पाउन सकेको छैन । १०–१० वटा पार्टीले सरकार बनाउन सक्दैन । गठबन्धन पनि कति हो टुंगो छैन । कहिले सात भन्या छ कहिले आठ, कहिले नौ, कहिले दश । राजनीतिक तामाशा देखाइएको छ’, ओलीले भने ।