काठमाडौँ– नेपाल छनोट भएको एसिया कप एकदिवसीय क्रिकेट प्रतियोगिता पाकिस्तानमा नहुने सम्भावना बढेको एक भारतीय अनलाइन पोर्टलले दाबी गरेको छ ।
एसियाली क्रिकेट परिषद् (एसिसी)ले उक्त प्रतियोगिता पाकिस्तानबाट श्रीलंकामा सार्न लागेको क्रिकेट कन्ट्री डट कमले दाबी गरेको छ ।
सुरक्षाका कारण भारत पाकिस्तान जान तयार नभएकाले प्रतियोगिता श्रीलंका सार्न लागिएको बताइएको छ ।
यद्यपि, यसको अन्तिम निर्णय भने यसै महिनाको अन्त्यमा हुनेछ । बंगलादेश र अफगानिस्तानले पनि आयोजनाको दाबी गरिरहेको समाचारमा उल्लेख छ ।
यदि, आफूलाई आयोजना गर्नबाट बञ्चित गरिए पाकिस्तानले प्रतियोगिता बहिस्कार गर्ने सम्भावना छ । यस्तोमा युएईले अवसर पाउने सम्भावना रहेको देखिन्छ ।
यस वर्षको एसिया कपमा ६ टोली सहभागी छन् । समूह ‘ए’मा नेपालसहित भारत र पाकिस्तान छन् ।
यस्तै, समूह ‘बी’मा साविक विजेता श्रीलंका, बंगलादेश र अफगानिस्तान छन् ।
एसिसी प्रिमियर कपको फाइनलमा युएईलाई हराउँदै नेपाल एसिया कपमा छनोट भएको हो । नेपालले पहिलोपटक एसिया कप खेल्न लागेको हो ।
यो प्रतियोगिता आगामी सेप्टेम्बरमा हुने तय छ ।
