काठमाडौं–जनता समाजवादी पार्टीका अध्यक्ष उपेन्द्र यादवले विनियोजन विधेयकको सिद्धान्त र प्राथमिकतामा तत्कालीन समस्या समाधानका लागि यथार्थपरक मार्गचित्र प्रस्तुत नगरिएको बताएका छन् ।
प्रतिनिधिसभा बैठकमा विनियोजन विधेयकको सिद्धान्त र प्राथमिकतामाथिको छलफलमा उनले सिद्धान्त र प्राथमिकतामा अर्थ राजनीतिका बृहत् विषयवस्तु समावेश गरिनु सबल पक्ष भएको बताए ।
‘सिद्धान्त र प्राथमिकतामा कोभिड महामारी, रुस र युक्रेन युद्ध जस्ता विश्व अर्थ राजनीतिक घटनाबाट मुलुकमा उत्पन्न मुद्रास्फिति, क्रय शक्तिमा ह्रास, खाद्य सुरक्षाको सम्भावित संकट, आर्थिक वृद्धिदर, अस्थिर विदेशी विनियम सञ्चिति, ब्याजदर अप्राकृतिक, मिटरब्याजदरलगायतका तत्कालीन समस्या समाधानका लागि यथार्थपरक मार्गचित्र प्रस्तुत गरिएको छैन’, उनले भने ।
त्यस्तै, उत्पादन र उत्पादकत्व वृद्धि गर्ने सिद्धान्तहरु ल्याइनु राम्रो भएको उनले बताए ।
यादवले संघीयतालाई बलियो बनाएमात्र विकासको काम अघि बढ्ने बताए ।
उनले अघिल्लो आर्थिक वर्षमा पनि प्रदेशलाई बजेट थोरै भएको गुनासो गरे।
‘संघीयतालाई कमजोर बनाएर विकास अगाडि बढ्दैन, अघिल्लो पटकपनि प्रदेशलाई बजेट थोरै दिइएको थियो,’ उनले भने, ‘सायद अहिले पनि होला, १४ प्रतिशत बजेट छुट्याइएको थियो । ७ वटा प्रदेशले १४ प्रदेश बजेटबाट कसरी विकास गर्लान? त्यसकारण वित्तीय संघीयता अत्यन्त महत्वपूर्ण पक्ष हो ।’
