काठमाडौँ– रोयल च्यालेन्जर्स बेंगलोरमाथि सानदार जित निकाल्दै मुम्बई इन्डियन्स भारतमा जारी इन्डियन प्रिमियर लिग (आइपिएल) क्रिकेटको तेस्रो स्थानमा उक्लिएको छ ।
सर्वाधिक ५ पटकको विजेता मुम्बईले बेंगलोरमाथि ६ विकेटको सानदार जित निकालेको हो ।
सूर्यकुमार यादव र नेहाल वादेराको सानदार साझेदारीमा घरेलु टोली मुम्बईको जित सम्भव भयो ।
बेंगलोरले दिएको २०० रनको लक्ष्य मुम्बईले १६ दशमलब ३ ओभरमा ४ विकेट गुमाएर पूरा गरेको हो ।
मुम्बईको जितमा सूर्यकमार तथा निहालले अर्धशतकीय पारी खेले । सूर्यले ८३ रन बनाए ।
नेहालले अविजित ५२ रन बनाए । तेस्रो विकेटका लागि सूर्यले निहालसँग मिलेर ६४ बलमा १४० रनको सानदार साझेदारी गरेका थिए । यही विष्फोटक साझेदारीले नै जितको आधार तय भएको हो ।
बेंगलोरका लागि विजयकुमार वैशाख र वानिंदू हसरंगाले समान २÷२ विकेट लिए पनि त्यो टोलीको जितका लागि पर्याप्त भएन ।
त्यसअघि टस हारेर पहिले ब्याटिङ गरेको बेंगलोरले निर्धारित २० ओभरमा ६ विकेट गुमाउँदै १९९ रन जोडेको थियो ।
कप्तान फाफ डू प्लेसिस र अलराउन्डर ग्लेन म्याक्सवेलले शतकीय साझेदारी गरेका थिए । दुवैले अर्धशतक पनि बनाए ।
कप्तान डू प्लेसिसले ६५ तथा म्याक्सवेलले ६८ रन जोडे ।
मुम्बईका लागि जेसन बेह्रेनडर्फले ३ तथा कुमार कार्तिक, क्रिस जोर्डन र क्यामरुन ग्रिनले समान १÷१ विकेट लिए ।
यस जितसँगै ११ खेलमा ६ जित र ५ हारसँगै १० टोली सहभागी लिगमा मुम्बई १२ अंकका साथ तेस्रो स्थानमा उक्लिएको छ ।
पराजित बेंगलोर भने ११ खेलमा ५ जित र ६ हारका साथ अंक तालिकाको सातौं स्थानमा झरेको छ ।
