काठमाडौँ– आफ्ना नेता बालकृष्ण खाँण नक्कली भुटानी शरणार्थी प्रकरणमा पक्राउ परेपछि नेपाली कांग्रेसले बुधबार आकस्मिक रुपमा पदाधिकारी बैठक बोलाएको थियो ।

सभापति शेरबहादुर देउवाले धुम्बाराहीस्थित निवासमा बोलाएको आकस्मिक बैठक करिब ३ घण्टासम्म चलेको थियो । 

बैठकमा बुधबारै पक्राउ परका खाँणका बारेमा छलफल भएको एक पदाधिकारीले जानकारी दिए । उनका अनुसार कुनै निर्णय नभएकोले आज फेरि बैठक बसेर खाँणका बारेमा निर्णय लिने छलफल भएको थियो ।

बैठकपछि नेताहरूले पत्रकारलाई प्रतिक्रिया दिन चाहेनन् । बैठक चलिरहेको समयमा देउवा निवासमा पत्रकारलाई प्रवेश गर्न रोक लगाइएको थियो ।

यद्यपि, बैठकमा उपसभापति धनराज गुरुङ,  महामन्त्रीद्वय गगन थापा, विश्वप्रकाश शर्मा लगायतले पार्टीका केन्द्रीय सदस्य खाँणलाई निलम्बन गर्नेपर्नेमा जोड दिएका थिए । सहमहामन्त्री महेन्द्र यादवले भने खाँणलाई षड्यन्त्रपूर्वक पक्राउ गरिएको भन्दै लोकतन्त्रमाथि खतरा रहेको बताएका थिए ।

बुधबार बिहान पक्राउ परेका पूर्वगृहमन्त्री खाँणलाई जिल्ला अदालत काठमाडौँले अनुसन्धानका लागि थुनामा राख्न ४ दिन म्याद अनुमति दिएको छ ।