काठमाडौँ– चार पटकको विजेता चेन्नाईले सुपर किंग्स भारतमा जारी १६ औँ संस्करणको इन्डियन प्रिमियर लिग (आइपिएल)को प्ले अफमा पुग्ने सम्भावना बलियो बनाएको छ ।
गएराति भएको खेलमा दिल्ली क्यापिटल्सलाई २७ रनले पराजित गर्दै चेन्नाईले प्ले अफ सम्भावना बलियो बनाएको हो ।
१२ खेलमा सातौँ जित हात पारेको चेन्नाई १५ अंकसहित दोस्रो स्थानमा छ । चेन्नाईले लिगमा अब बाँकी २ मध्ये १ मात्र खेल जिते पनि प्ले अफमा पुग्नेछ ।
सातौँ हार बेहोरेको दिल्ली ११ खेलबाट ८ अंकसहित अन्तिम स्थानमा छ । उसको प्ले अफको सम्भावना लगभग सकिएको छ ।
चेन्नाईको घरेलु मैदान एमए चितम्बरम रंगहालामा भएको खेलमा १६८ रनको लक्ष्य पछ्याएको दिल्लीले निर्धारित २० ओभरमा ८ विकेट गुमाएर १४० रन मात्र बनाउन सक्यो ।
दिल्लीका लागि राइले रुसोले सर्वाधिक ३५ रन बनाए । यस्तै, मनीष पाण्डेले २७ र अक्षर पटेलले २१ रन जोडे पनि त्यो टोलीको जितका लागि पर्याप्त भएन ।
चेन्नाईका लागि मथिशा पिथरनाले ३ तथा दीपक चाहरले २ विकेट लिए । यसैगरी, रवीन्द्र जडेजाले १ विकेट हात पारे ।
त्यसअघि टस जितेर पहिले ब्याटिङ गरेको चेन्नाईले ८ विकेट गुमाएर १६७ रन बनाएको थियो ।
चेन्नाईका लागि शिभम दुबेले १२ बलमा सर्वाधिक २५ रन बनाए । ओपनर रुतुराज गाएकवार्डले १८ बलमा २४ रन जोडे । यस्तै अम्बाती राएडूले १७ बलमा २३ तथा रवीन्द्र जडेजाले १६ बलमा २१ रन बनाए ।
अजिक्य रहानेले पनि २१ रन नै जोडे । कप्तान महेन्द्रसिंह धोनीले ९ बलमा अविजित २० रन जोडे ।
दिल्लीका मिचेल मार्सले सर्वाधिक विकेट लिए ।
