काठमाडौँ– राष्ट्रिय प्रजातन्त्र पार्टी (राप्रपा)को केन्द्रीय समितिको बैठक आज बस्दैछ ।
पार्टी कार्यालय धुम्बाराहीमा आज केन्द्रीय समितिको पूर्ण बैठक बोलाइएको हो ।
राप्रपाका नेता राजाराम श्रेष्ठका अनुसार जेठ ३ गतेसम्म चल्ने बैठकमा मुलुकको समसामयिक राजनीतिक अवस्था, निर्वाचनको समीक्षा, प्रदेश तथा जिल्लामा भएका साङ्गठनिक गतिविधिको समीक्षा, राष्ट्रिय तथा अन्तर्राष्ट्रिय परिस्थितिबारे छलफल हुनेछ ।
बैठकमा अध्यक्ष राजेन्द्र लिङ्देनले भावी कार्यदिशासम्बन्धी राजनीतिक प्रतिवेदन र वरिष्ठ उपाध्यक्ष रवीन्द्र मिश्रले पार्टीको संगठनको रणनीति र कार्यनीतिसम्बन्धी प्रतिवेदन प्रस्तुत गर्नेछन् ।
बैठकमा सचिवालयसम्बन्धी र आर्थिक प्रतिवेदन पनि पेस गरिनेछ ।
बैठकमा पेस हुने सबै प्रतिवेदनमाथि केन्द्रीय सदस्यले आफ्नो धारणा राख्नेछन् । पार्टीको कार्ययोजनाको समीक्षा गरी आगामी कार्यदिशा तय गरिनेछ ।
राप्रपाको केन्द्रीय समिति बैठक झण्डै १० महिनापछि बस्न लागेको हो । वैशाख ३० र ३१ गते बस्ने गरी बैठक बोलाइएको भए पनि तयारी नपुगेको भन्दै जेठ १ का लागि सारिएको थियो ।
