काठमाडौँ– नेपालसहित संसारका केही देशमा अबैध घोषणा गरिएको अनलाइन गेमिङ साइट वानएक्स बेटले नेपालीसँग अबैध रकम उठाउने गरेको तथ्य फेला परेको छ ।

भारतमा जारी आइपिएल खेलको मौका पारेर नेपालीलाई अबैध अनलाइन जुवा खेलाउने गरिएको पाइएको हो । यसका लागि क्रिकेट सम्बन्धी जानकारी दिने साइट इएसपिएन क्रिकइन्फो डटकम र लोकप्रिय क्रिकेट खेलाडी किरण पोलार्डलाई प्रयोग गरिएको छ ।

पछिल्लो समय क्रिकेट खेल नेपालमा पनि लोकप्रिय भएको छ । आइपिएलमा मुम्बइ इन्डियनबाट खेल्ने वेष्ट इन्डिजका अलराउन्डर क्रिकेटर पोलार्ड लोकप्रिय खेलाडी हुन् । आइपिएललगायतका क्रिकेट खेलको लाइभदेखि क्रिकेट सम्बन्धी धेरै जानकारी इएसपिएन क्रिकइन्फो डटकमले दिने गर्छ । 

वानएक्स बेटले क्रिकेटर पोलार्डलाई आधिकारिक ब्राण्ड एम्बेसडर बनाएको छ भने इएसपिएन क्रिकइन्फो डटकममा विज्ञापन गरिएको छ । सो विज्ञापन नेपालबाट हेर्दा नेपाली भाषामा पनि देखिन्छ । र, नेपालका भुक्तानी सेवा प्रदायक कम्पनीहरु खल्ती, कनेक्ट आइपिएस, आइएमई पे जस्ता कम्पनीबाट रकम भुक्तानी गरी अनलाइन जुवामा सहभागी हुन पाइन्छ ।

अरु खेलामा पनि हुन्छ बेटिङ

वानएक्स बेटले आइपिएल मात्रै होइन, अन्य लोकप्रिय खेलामा पनि सट्टेबाजी गर्ने गराएको पाइएको छ । सो कम्पनीले फुटबलको च्याम्पियन्स लिंग, टेलिनसको ग्राण्डस्लाम जस्ता खेलमा पनि बेटिङ गराउने गरेको उसको वेबसाइटमा भेटिन्छ । 

वेबसाइटमा उल्लेख भएअनुसार राष्ट्रिय टीम र ठूला स्पर्धाको बारेमा बेट गर्न सकिन्छ । यस्तै, क्यासिन, लाइभ क्यासिनो, वानएक्स गेम, विंगो लगायतका अनलाइन गेम खेल्न सकिन्छ ।

कसरी खेलाइन्छ ?

सो अनलाइन गेमिङ (अनलाइन जुवा) मा कुनै पनि खेलमा कुनै पनि खेलाडीको प्रदर्शन, खेलको नतिजा जस्ता विषयमा बेटिङ (सट्टेबाजी) गराइन्छ । जस्तो कि हिजो आइपिएलमा मुम्बइ इन्डियन्स र लखनाउबीच खेल  भएको थियो । सो खेलमा कसले टस जित्छ भनेर पनि बेटिङ गर्न सकिन्छ ।

सो खेलमा लखनाउले पहिला व्याटिङ गरेको थियो । पहिला व्याटिङ गर्दा लखनाउले कति रन बनाउँछ वा त्यसका कुन खेलाडीले कति रन बनाउँछन् भनेर पनि बेटिङ हुन्छ । खेल कसले जित्छ भनेर पनि बेटिङ गराइन्छ भने कुन बलमा कुन खेलाडीले कति रन बनाउँछन् वा बाइड, नो रन वा के हुन्छ भनेर पनि बेटिङ गराइन्छ ।

कसरी तिर्ने रकम ?

अनलाइन जुवामा सहभागी हुनको लागि निश्चित रकम तिर्नुपर्छ । सो रकम तिर्नको लागि वानएक्स बेटले आफ्नो वेबसाइटमार्फत दिएको जानकारी अनुसार नेपालका भुक्तानी माध्यमहरु प्रयोग गर्न पाइन्छ । कनेक्ट आइपिएस, इसेवा, खल्ती, आइएमई पेलगायत नेपाली कम्पनीमार्फत भुक्तानी गर्न सकिन्छ । 

यसरी भुक्तानी गर्दा नेपाली एजेन्टले नेपालीमै रकम बुझ्ने गरेका छन् । उनीहरुले बुझेको रकम पछि विदेशी मुद्रामा परिवर्तन गरी सम्बन्धित कम्पनीलाई दिने गरिएको छ । विदेशी मुद्रामा भुक्तानी गर्नको लागि भने भिसा, मास्टर कार्ड जस्ता अन्तराष्ट्रिय भुक्तानी सेवा प्रदायकहरु जोडिने गरेका छन् ।

नेपालीका लागि छुट्टै सहयोगी टीम

अनलाइन जुवाको मुख्य ध्यान भनेको कमाउने हो । त्यसैले कम्पनीले रकम भुक्तानीको लागि सहजीकरण गर्न नेपालीको लागि बेग्लै टीम राखेको देखिन्छ ।

कम्पनीले आफ्नो वेबसाइटमा अनलाइन गेमिङअघि रकम भुक्तानी गर्ने तरिकाका बारेमा नेपाली भाषामा नै जानकारी दिएको छ । र, त्यस्तो जानकारीले पनि भुक्तानीमा समस्या भए सम्पर्क गर्न भनेर नेपालीको लागि बेग्लै इमेल ठेगाना उपलब्ध गराएको छ ।

कम्पनीले भनेको छ– ‘कृपय यदि डिपोजिट अथवा निकासी रकम समयमा नआएमा खल्ती वा बैंकमा सम्पर्क गर्नुहुन अनुरोध छ र खल्ती वा बैंकबाट पैसा ट्रान्सफर गर्दा कृपया रिमार्कमा हजुरको फोन नम्बर राखिहोस् । यदि कुनै समस्या आएमा धैर्यताका साथ हाम्रो सर्पाेर्टको इमेल  info-npl@1xbet-team.com मा आफ्नो समस्याका साथ इमेल गर्नुहोला ।’

अनलाइन बेटिङमा जितेको रकम खल्ती खातामा आइपुग्न ४८ घण्टा लाग्ने भनिएको छ ।

जित्नेले आइफोन पाउने

अनलाइन बेटिङमा जित्नेले आइफोन १४ का विभिन्न सिजिर जित्न सकिने जानकारी दिइएको छ । वेबसाइटमा दिइएको जानकारी अनुसार बेटिङमा सहभागी हुनेहरुले आइफोन १४ प्रो म्याक्स जित्न सक्ने भनिएको छ । यस्तै, आइफोन प्रो र आइफोन १४ पनि जित्न सकिने अफर ल्याइएको छ ।

प्रहरीमा छैन उजुरी

नेपालीलाई नै लक्षित गरेर अनलाइन गेमिङको विज्ञापन भइरहे पनि यसबाट ठगियौं भन्दै प्रहरीमा जानेहरु भने भेटिएका छैनन् । ठगियौं भन्नेहरु पनि यो गेममा सहभागी हुने भएकोले उनीहरुले उजुरी गर्ने आँट नगरेको हुन सक्ने जिल्ला प्रहरी परिसर काठमाडौँका प्रवक्ता सिताराम रिजाल बताउँछन् । यद्यपि, प्रहरीले यससम्बन्धी मुद्दा दर्ता गरिसकेको उनले जानकारी दिए ।

‘पीडित भएँ भनेर आउने व्यक्ति पनि अनलाइन गेमिङमा सहभागी भएको नै हुने भएकोले उसले पनि उजुरी गर्ने आँट नगरेको हो कि भन्ने जस्तो पनि देखिन्छ । तर, प्रहरीले आफ्नै प्रतिवेदनबाट यसअघि नै वानएक्स बेटमा संलग्न भएका आधारमा ८ वटाभन्दा बढी मुद्दा चलाइसकेको छ । यो गैरकानुनी कार्यमा संलग्नहरुलाई समाउने नै हो, कारबाही हुन्छ नै,’ प्रवक्ता रिजालले सिएन नेपालसँग भने ।

सघाउँदै साइबर व्यूरो

अनलाइन गेमिङलाई जुवा अन्तरगत राखेर प्रहरीले कारबाही गरिरहेको छ । सोही कारण प्रहरीको साइबर व्यूरोले यसमा प्रत्येक्ष संलग्नता जनाएको छैन । तर, प्राविधिक विषय भएकोले आफूहरुले सहयोग गरिरहको साइबर व्यूरोका प्रवक्ता पशुपतिकुमार राय बताउँछन् ।

‘अनलाइन गेमिङ पनि एक प्रकारको जुवा नै भयो । जुवा हेर्ने जिम्मेवारी जिल्ला प्रहरी परिसरलाई छ । त्यसैले यो विषयमा जिल्ला प्रहरी परिसर काठमाडौँले हेरिरहेको छ भने हामीले आवश्यक परेको अवस्थामा प्राविधिक सहयोग गरिरहेका छौं,’ प्रवक्ता रायले भने ।

नेपाली एजेन्ट खोज्दै प्रहरी

प्रहरीले अहिलेसम्म केही व्यक्ति पक्राउ परेपनि नेपाली एजेन्ट भने पक्राउ नपरेको ठानेको छ । यसैकारण जिल्ला प्रहरी परिसर काठमाडौँ, साइबर व्यूरो र केन्द्रीय अनुसन्धान व्यूरो (सिआइबी) को संयुक्त टोलीले गोप्य रुपमा यसको अनुसन्धान गरिहेको प्रहरी अधिकारीहरुले जानकारी दिएका छन् ।

सो टोलीले नेपालको मुख्य एजेन्ट खोज्नेदेखि कति रकम बराबरको खेल हुने गरेको छ, नेपालमा कोको सहभागी छन् भन्ने जस्ता विषयमा अनुसन्धान गरिरहेको बताइएको छ ।

वानएक्स बेट– फुटबल क्लबदेखि पोर्नाेहवसम्म

वानएक्स बेट कम्पनी सन् २००९ मा स्थापना भएको कम्पनी हो । यसको केन्द्रीय कार्यालय साइप्रसको लिमासोलमा छ । संसारका १३४ देशमा सेवा विस्तार गरिसकेको दाबी गर्ने यो कम्पनीले अनलाइन बेटिङ र गेमिङ गराउने गरेको भेटिएको छ । यो कम्पनीको वार्षिक आम्दानी २ अर्ब अमेरिकी डलर रहेको बताइएको छ । यसका विभिन्न ५ वटा सहायक कम्पनी पनि छन् । यसलाई नेदरल्याण्डको कुराकायो राज्यले इगेम्बलिङको लाइसेन्स दिएको थियो । 

फुटबल क्लब बार्सिलोनाले सन् २०१९ मा वानएक्स बेटलाई आफ्नो नउाँ पार्टनर भनेर घोषणा गरेको थियो ।

बेलायती पत्रिका द सन्डे टाइम्सले सन् २०१९ मा वानएक्स बेट सम्बन्धी एउटा अनुसन्धानमुलक समाचार प्रकाशित गर्यो । सो समाचारमा वानएक्स बेटले पोर्नाेहव क्यासिनोलाई प्रबर्धन गरेर बेलायतको गेम्बलिङ कमिसनले गरेको व्यवस्था उल्लघंन गरेको उल्लेख छ । 

टाट पल्टिएको कम्पनी

वानएक्स बेट कम्पनीको एउटा सहायक कम्पनी वानएक्स कर्प एमभी पनि हो । सन् २०२१ को नोभेम्बरमा नेदरल्याण्डको कुराकाओ अदालतले सो सहायक कम्पनीलाई टाट पल्टिएको घोषणा गर्यो । कुराकाओका गेमिङ प्रभावितहरुलाई रकम फिर्ता गर्नुपर्दा सो कम्पनी टाट पल्टिएको बताइएको थियो ।

यस्तै, सन् २०२३ को जनवरीमा भने नेदरल्याण्डको सर्वाेच्च अदालतले वानएक्स बेट कम्पनीलाई टाट पल्टिएको घोषणा गरेको थियो । यद्यपि, सोही कम्पनीको नाममा अहिले नेपालीलाई अनलाइन जुवा खेलाउने धन्दा चलिरहेको छ ।