काठमाडौँ– सञ्चार तथा सूचना प्रविधिमन्त्री एवं नेपाल सरकारका प्रवक्ता रेखा शर्माले सङ्घीय लोकतान्त्रिक गणतन्त्रको रक्षा र सुदृढीकरण गर्नु सरकारको प्रमुख दायित्व भएको बताएकी छन् ।
आसन्न गणतन्त्र दिवसका सन्दर्भमा आज यहाँ आयोजित विभिन्न मन्त्रालयका प्रवक्ताहरुको बैठकलाई सम्बोधन गर्दै उनले गणतन्त्र स्थापनाका गौरवमय १५ वर्षको समीक्षासहित यसबीचमा भएका प्रगतिका सूचक र तथ्य जनताको बीचमा लैजानुपर्नेमा जोड दिइन् ।
सरकार वा अन्य सार्वजनिक जिम्मेवारीमा बस्ने व्यक्तिबाट हुने कमजोरीलाई व्यवस्थाकै कमजोरीजस्तो गरी प्रचार गर्ने गलत प्रवृत्ति विकास हुन थालेकामा चिन्ता व्यक्त गर्दै उनले व्यक्तिका कमजोरीका कारण व्यवस्थामाथि प्रहार गर्ने प्रवृत्तिलाई निरुत्साहित गर्नुपर्ने बताइन् ।
पात्र वा प्रवृत्तिका कारण प्रणालीमाथि नै आक्रमण गर्ने गलत रबैयाका विरुद्ध गणतान्त्रिक व्यवस्थाले गरेका राम्रा कामको तथ्यसङ्गत छलफल हुनु आवश्यक रहेको पनि मन्त्री शर्माले बताइन् ।
“जिम्मेवारीमा बसेका व्यक्तिहरुबाट बेलाबेलामा कमजोरी नभएका होइनन्, त्यस्तो कमजोरी गर्नेहरुले ढिलाचाँडो सजाय पाउँछन्”, मन्त्री शर्माले भनिन्, “तर, व्यक्तिबाट हुने कमजोरीको दोष व्यवस्थाको होइन बरु गणतन्त्र मात्रै यस्तो व्यवस्था हो, जसले शक्तिमा बसेर कमजोरी गर्नेहरुलाई पनि सजायको भागिदार बनाउँछ ।”
सङ्घीय लोकतान्त्रिक गणतन्त्र स्थापना हुनुुभन्दा अघि र आजको अवस्थाको तुलनात्मक अध्ययन गरी तथ्यगत विवरण जनताका बीचमा लैजान प्रवक्ताहरुलाई आग्रह गर्दै उनले राजनीतिक, आर्थिक, सामाजिक, सांस्कृतिक, पर्यावरणीय समग्र क्षेत्रमा कहाँ सुधार भएको छ र कहाँ अझै सुधार गर्नुपर्छ यसको तुलनात्मक विश्लेषण आवश्यक रहेको बताइन् ।
सरकारले गर्ने राम्रा काम समयमै जनताका बीचमा पुुग्नुपर्नेमा जोड दिँदै उहाँले सिङ्गो सरकारका गतिविधिलाई एकद्वार प्रणालीबाट जनताका बीचमा लैजाने तयारी पनि थालिएको जानकारी दिइन् । त्यसका लागि सबै मन्त्रालयका गतिविधि एकद्वार प्रणालीबाट सूचना विभागले सार्वजनिक गर्ने गरी वेबसाइट र एपको तयारी गरिरहेको उनले बताइन् ।
