काठमाडौँ– एनएससी–काभा अन्तर्राष्ट्रिय महिला भलिबल प्रतियोगितामा लगातार दोस्रो जित निकाल्ने लक्ष्यमा रहेको नेपाल आज बंगलादेशविरुद्ध भिड्दै छ ।
राष्ट्रिय खेलकुद परिषद (राखेप)को कभर्डहलमा नेपालले बंगलादेशको सामना गर्न लागेको हो । नेपाल र बंगलादेशबीचको खेल दिउँसो ३ बजे सुरु हुनेछ ।
सोमबारदेखि सुरु भएको नेपालले कीर्गिस्तानलाई पराजित गर्दै प्रतियोगितामा सुखद सुरुआत गरेको थियो । यसर्थ, आयोजक नेपाल आज बंगलादेशलाई हराउँदै लगातार दोस्रो जित निकाल्न चाहन्छ ।
पहिलो खेलमा नेपालले कीर्गिस्तानलाई ३–० को सोझो सेटमा पराजित गरेको हो । नेपालले किर्गिस्तानाई पहिलो सेट २५–११ दोस्रो सेट २५–१९ र तेस्रो सेट २५–११ ले पराजित गरेको थियो ।
यस जितसँगै नेपालले ३ अङ्क जोडेको छ । सोही स्थानमा सोमबार नै भएको अर्को खेलमा भारतले बंगलादेशमाथि ३–० को सोझो सेटमा जित निकालेको थियो ।
भारतले बंगलादेशलाई २५–३, २५–९ र २५–६ ले हरायो । यस जितसँगै भारतले ३ अंक जोड्यो । प्रतियोगितामा विभिन्न आठ राष्ट्रको सहभागिता रहेको छ ।
