काठमाडौँ– विश्वकप विजेता अर्जेन्टिना राष्ट्रिय फुटबल टोलीले एसिया आएर २ मैत्रीपूर्ण खेल खेल्ने भएको छ ।
अर्जेन्टिनाले अष्ट्रेलिया र इन्डोनेसियासँग आगामी जुनमा मैत्रीपूर्ण फुटबल खेल्न लागेको हो ।
कतारमा गत डिसेम्बरमा विश्वकपको उपाधि जितेको अर्जेन्टिनाले अष्ट्रेलियासँगको पहिलो खेल चीनमा खेल्नेछ । यो खेल जुन १५ मा हुने अर्जेन्टिनी फुटबल संघले जनाएको छ ।
गत विश्वकपको अन्तिम १६ मा अर्जेन्टिनाले अष्ट्रेलियालाई २–१ ले हराएको थियो । यसर्थ, यो खेललाई त्यसैको रि–म्याचको रुपमा हेरिएको छ ।
यस्तै, अर्को खेल इन्डोनेसियासँग उसको घरेलु मैदानमै हुनेछ । यो खेल जुन १९ मा हुनेछ ।
अर्जेन्टिनाले गत मार्चमा पनि २ वटा मैत्रीपूर्ण खेल खेलेको थियो । विश्वकप जितेयता उ पहिलोपल्ट मैदानमा उत्रिएको थियो । अर्जेन्टिनाले घरेलु मैदानमा पनामालाई २–० तथा कुराकाओलाई ७–० ले हराएको थियो ।
