काठमाडौँ– चेल्सीमाथि ४–१ को सहज जित निकाल्दै म्यानचेस्टर युनाइटेड बिहीबार इंग्लिस प्रिमियर लिग फुटबलमा एक खेल खेल्न बाँकी छँदै च्याम्पियन्स लिगमा छनोट भएको छ । युनाइटेडले लिगको शीर्ष पक्का गर्दै आगामी सिजनको च्याम्पियन्स लिगका लागि टिकट पक्का गरेको हो ।
गएराति घरेलु मैदानमा भएको खेलको छैटौं मिनेटमा नै कासिमिरोले गरेको गोलमा युनाइटेडले अग्रता लिएको थियो । पहिलो हाफको इन्जुरी समयको पाँचौ मिनेटमा एन्थोनी मार्सियालले युनाइटेडको अग्रता दोब्बर बनाए । यस्तै, ७३औं मिनेटमा ब्रुनो फर्नान्डेसले पेनाल्टीको सदुपयोग गर्दै युनाइटेडको अग्रता ३–० मा पुर्याएका थिए ।
यसैगरी खेलको ७८औं मिनेटमा मार्कुस रासफोर्डले युनाइटेडका लागि तेस्रो गोल गरे । खेल सकिन एक मिनेट बाँकी रहँदा जाओ फेलिक्सले युनाइटेडका लागि सान्त्वना गोल फर्काएका थिए ।
युनाइटेड ३७ खेलमा ७२ अंकसहित तेस्रो स्थानमा छ । चौथो स्थानको न्युक्यासल युनाइटेडको समान खेलमा ७० अंक छ । लिग विजेता बनिसकेको म्यानचेस्टर सिटीको ८९ र दोस्रो स्थानको आर्सनलको ८१ अंक रहेको छ ।
अर्कोतिर युनाइटेडले चेल्सीमाथि जित निकालेसँगै ६ पटकको विजेता लिभरपुल भने च्याम्पियन्स लिगमा छनोट हुन असफल बनेको छ ।
लिभरपुल प्रिमियर लिगको पाँचौ स्थानमा रहेपछि छनोट हुन असफल बनेको हो ।
गत सिजन च्याम्पियन्स लिगको उपविजेता लिभरपुलले यस सिजन प्रिमियर लिगको सुरुवातबाटै स्वभाविक लय अनुसारको प्रदर्शन गर्न सकेको थिएन । योर्गन क्लोपको प्रशिक्षणमा रहेको लिभरपुलले आगामी सिजन युरोपा लिगमा प्रतिस्पर्धा गर्नेछ । क्लोप आएपछि लिभरपुलले पहिलोपटक युरोपा लिग खेल्न लागेको हो ।
