काठमाडौँ– प्रधानमन्त्री पुष्पकमल दाहाल प्रचण्डले आज सरकारको नीति तथा कार्यक्रममाथि संसद्मा उठेका प्रश्नकोे जवाफ दिने भएका छन् ।

आज दिउँसो ४ बजेपछि बस्ने प्रतिनिधिसभाको बैठकमा उनले सांसदहरूले उठाएका प्रश्नहरूको जवाफ दिने संसद् सचिवालयले जनाएको छ ।

गत जेठ ५ मा राष्ट्रपति रामचन्द्र पौडेलले दुवै सदनको संयुक्त बैठकमा सरकारको नीति तथा कार्यक्रम प्रस्तुत गरेका थिए ।

जेठ ७ देखि सांसदहरूले त्यसबारे छलफल गर्दै विभिन्न सवाल उठाएका थिए ।

प्रतिपक्षी दल एमाले र राप्रपाले नीति तथा कार्यक्रमको आलोचना गरेका थिए । 

प्रधानमन्त्री प्रचण्डले राष्ट्रियसभामा सांसदहरूले उठाएका प्रश्नहरूको जवाफ दिइसकेका छन् । 

प्रधानमन्त्री प्रचण्डले शुक्रबार नीति तथा कार्यक्रममाथि उठेका प्रश्नहरूको जवाफ दिने कार्यक्रम थियो । तर, प्रमुख प्रतिपक्षी एमालेको अवरोधका कारण आजका लागि सरेको हो । 

पशुपतिनाथ मन्दिरको गजुरमा तत्कालीन प्रधानमन्त्री केपी शर्मा ओलीले सुन भनेर पित्तल राखेको भन्दै नेपाली कांग्रेसले आरोप लगाएकोप्रति एमालेले शुक्रबार आपत्ति जनाएको थियो ।

कांग्रेसका सांसद लेखनाथ दाहाल केही दिनअघि संसद् बैठकमै ओलीले पशुपतिको गजुरमा सुन भनेर पित्तल राखेर भ्रष्टाचार गरेको आरोप लगाएका थिए । 

यसलाई लिएर एमाले संसदीय दलका उपनेता सुवास नेम्वाङ, प्रमुख सचेतक पदम गिरीलगायतले बैठकमा बोल्दै आपत्ति जनाएका थिए ।

त्यसलाई एमाले अध्यक्ष ओलीलगायत सबै सांसदले उठेर साथ दिएका थिए । त्यसपछि संसद् बैठक अवरुद्ध भएको थियो ।

सभामुख देवराज घिमिरेले २० मिनेटका लागि बैठक स्थगित भएको घोषणा गरेका छन् । २० मिनेटपछि पनि बैठक बस्न सकेन । त्यसपछि १२ बजे अवरुद्ध भएको बैठक ३ बजेका लागि बोलाइयो । ३ बजेपछि साँझ ६ बजेका लागि सरेको थियो । तर दुवै पक्षबीच सहमति नजुट्दा तोकिएको समयमा बैठक बस्न सकेन । त्यसपछि आजका लागि सारिएको थियो ।