काठमाडौँ– नेपाली कांग्रेसका महामन्त्री गगनकुमार थापाले पार्टी सुधार्न लाग्दा आफ्नो महामन्त्री पद गएपनि सो कार्यबाट पछि नहट्ने बताएका छन् । उनले पार्टी सुधारका पक्षमा होमिन नेता तथा कार्यकर्ताहरूलाई आग्रह पनि गरेका छन् ।
नेपाली कांग्रेस ललितपुरले गरेको एक कार्यक्रमलाई सम्बोधन गर्दै महामन्त्री थापाले यस्तो बताएका हुन् । उनले पार्टीलाई बेगका साथ सुधार गर्नुपर्ने पनि बताए ।
‘गलत निर्णय गर्नबाट पार्टीलाई रोक्न सकियो, पार्टीलाई सच्याउन सकियो र पार्टीलाई जनमुखी बनाउन सकियो भने कसैले पनि रोक्न सक्दैन । हाम्रो बेगलाई कसैले रोक्न सक्दैन, नयाँ पुराना कोहीसँग डराउन पर्दैन। तर, पार्टीमा जहाँ रोग लागेको छ त्यहाँ उपचार गर्नुपर्छ,’ महामन्त्री थापाले भने ।
उनले पार्टीभित्र देखिएका समस्या समाधान गर्ने आँट गर्नुपर्ने बताए। यस्तो आँट नेतादेखि कार्यकर्तासम्मले गर्नुपर्ने उनको भनाइ छ ।
‘पार्टीको प्रत्येक सदस्य अब जोखिम उठाउन तयार हुनुपर्छ। सबै जना मानिस अब आफ्नो सुविधाको ठाउँबाट बाहिर निस्कनुपर्छ । मेरो पद गए जाओस्, म कांग्रेस कार्यकर्ता मात्रै भएर बस्न परे बस्छु। म कांग्रेसको महामन्त्री छु, पार्टी सुधार गर्ने काममा जोखिम उठाएर काम गर्दै गर्दा महामन्त्री गए जाओस्। सदस्य मात्रै भएर बस्न परे बसुँ,’ महामन्त्री थापाले भने ।
