काठमाडौँ– राष्ट्रिय स्वतन्त्र पार्टी (रास्वपा)ले भारत भ्रमणका क्रममा प्रधानमन्त्री पुष्पकमल दाहाल प्रचण्डले हालै जारी भएको ‘अखण्ड भारत’को नक्साको विषय उठाउनुपर्ने माग गरेको छ ।

पार्टीका प्रवक्ता डा मुकुल ढकालले आज एक विज्ञीपत जारी गर्दै विषय उठान गरी सत्यतथ्य बाहिर ल्याउन आग्रह गरेका छन् ।

‘आसन्न भारत भ्रमणको क्रममा यो विषय उठान गरी जनतासमक्ष यसको सत्यतथ्य सार्वजनिक गर्न हामी जोडदार माग गर्दछौँ,’ विज्ञीपतमा भनिएको छ ।

नेपालको सार्वभौमसत्ता, भौगोलिक अखण्डता र स्वाधीनतासँग प्रतिकुल हुने कुनै पनि कदम रास्वपालाई स्वीकार्य नभएको ढकालको भनाइ छ ।

‘भारतको नयाँ संसद भवनमा काठमा कुँदिएको अखण्ड भारत नामक नक्सामा नेपालको लुम्बिनी र कपिलवस्तु पनि रहेको भन्ने विभिन्न सञ्चारमाध्यबाट सार्वजनिक भएको समाचारप्रति रास्वपाको गम्भीर ध्यानार्कषण भएको छ,’ विज्ञीपतमा भनिएको छ, ‘नेपालको सार्वभौमसत्ता, भौगोलिक अखण्डता र स्वाधीनतासँग प्रतिकुल हुने कुनै पनि कदम राष्ट्रिय स्वतन्त्र पार्टीलाई स्वीकार्य छैन । प्रधानमन्त्रीको आसन्न भारत भ्रमणको क्रममा यो विषय उठान गरी जनता समक्ष यसको सत्यतथ्य सार्वजनिक गर्न हामी जोडदार माग गर्दछौँ ।’

प्रधानमन्त्री प्रचण्ड आजै भारतको भ्रमणमा जाँदैछन् ।