काठमाडौँ - नेकपा एसका नेता झलनाथ खनालले सर्लाहीमा सर्प पालनको योजनामा आफ्नो कुनै संलग्नता नरहेको बताएका छन् ।

बिहीबार काठमाडौँमा पत्रकार सम्मेलन गरी उनले सर्प फार्म बनाउने योजनामा आफ्नो संलग्नता पुष्टि गरे अहिले नै हतकडी लाउन तयार रहेको बताएका हुन् ।

उनले भने, ‘म के भन्न चाहन्छु भने यदि त्यो केसमा मेरो संलग्नता भेटियो र एक पैसा मात्रै पनि मबाट दुरुपयोग भएको छ भने अहिले नै हतकडी लाउन तयार छु । अख्तियार र अरु तमाम संस्थालाई भन्न चाहन्छु, मेरो छानबिन गर्नुस् । मैले राजनीतिलाई कमाइ खाने धन्दा ठानेको छैन । त्यसै दिन एउटा कमिटी बनाएर उच्चतम रूपमा हामीले के गर्न सकिन्छ प्रस्ताव अगाडि सार्नुस् म अगाडि बढाउँछु भनेँ । त्यसपछि उहाँहरूले प्रस्ताव बनाउनुभयो ।'

उनले थपे, 'सर्पको भेनम निकाल्न सर्पकै विष निकाल्नुपर्छ । त्यसपछि घोडामा चेक गरिन्छ, त्यसलाई प्रशोधन गरेर भेनम बनाइने रहेछ । तपाईँकै सोचविचारको उपज भएकाले, हामी झलनाथ खनाल स्वास्थ्य विज्ञान प्रतिष्ठान बनाउँछौँ त्यसमार्फत सरकारसँग कोल्याबरेसन गर्छौँ, नाम राख्ने स्वीकृति दिनुपर्‍यो भन्न आउनुभयो । मैले मेरो नाम राख्ने अनुमति जस्ट यत्ति दिएको हो । यसमा मेरो संलग्नता छैन, न म्यानेजमेन्टमा संलग्नता, न आर्थिक संलग्नता, खाली मेरा नैतिक रूपमा संलग्नता मात्र हो । खाली नेपालमा यस्तो उद्यम बनोस्, भेनम बनोस्, नेपाली जनताले सेवा प्राप्त गरुन् मेरो चाहना हो । केही मुठ्ठीभरका साइबर स्यालहरू छन् । तिनीहरूले यो प्रचार गर्छन् । तिनीहरूको काम अरु छैन कि, मेरो इन्टरभ्यु आएपछि तल (सामाजिक सञ्जालको कमेन्टमा आलोचना) थालिहाल्छन् ।’