काठमाडौँ– विश्वकप विजेता अर्जेन्टिना राष्ट्रिय फुटबल टोली अष्ट्रेलियाबीचको खेलको टिकट १० मिनेटमै बिक्री भइसकेको छ ।
खुला गरिएको १० मिनेटमै सबै टिकट बिक्री भएको अर्जेन्टिनी फुटबल संघले जनाएको छ ।
अर्जेन्टिनाले एसिया आएर २ मैत्रीपूर्ण खेल खेल्दैछ ।
अर्जेन्टिनाले अष्ट्रेलिया र इन्डोनेसियासँग यही जुनमा मैत्रीपूर्ण फुटबल खेल्न लागेको हो ।
कतारमा गत डिसेम्बरमा विश्वकपको उपाधि जितेको अर्जेन्टिनाले अष्ट्रेलियासँगको पहिलो खेल चीनमा खेल्नेछ । यो खेल जुन १५ मा हुनेछ । यही खेलको टिकट क्षण भरमै बिक्री भइसकेको हो ।
पछिल्लो समय यी २ टोलीले विश्वकपको अन्तिम १६ मा खेलेका थिए । जहाँ लियोनल मेसीको अर्जेन्टिना २–१ ले विजयी भएको थियो ।
यस्तै, अर्को खेल इन्डोनेसियासँग उसको घरेलु मैदानमै हुनेछ । यो खेल जुन १९ मा हुनेछ ।
अर्जेन्टिनाले गत मार्चमा पनि २ वटा मैत्रीपूर्ण खेल खेलेको थियो । विश्वकप जितेयता उ पहिलोपल्ट मैदानमा उत्रिएको थियो । अर्जेन्टिनाले घरेलु मैदानमा पनामालाई २–० तथा कुराकाओलाई ७–० ले हराएको थियो ।
