लमजुङ– आगामी आर्थिक वर्षका लागि संघीय सरकारबाट लमजुङमा १० वटा सडकले बजेट पाउने भएका छन् । जिल्लाका विभिन्न स्थानिय तहहरुका सडक स्तरोन्नतिका लागि समपुरक एवं विशेष अनुदानअन्तर्गत १० वटा सडकका लागि बजेट विनियोजन भएको हो ।
सडक योजनाअन्तर्गत बेसीसहर, दोर्दी र दूधपोखरीका दुईवटा सडक परेका छन् । सोबाहेक मध्यनेपाल, राइनास, सुन्दरबजार र मस्र्याङ्दीका एक–एकवटा सडक परेका छन् । जिल्लाको क्होलासोँथार गाउँपालिकाको लागि भने एउटै सडकका लागि पनि बजेट विनियोजन भएको छैन ।
सडक स्तरोन्नति योजनाअन्तर्गत बेसीसहरस्थित धुरपुरे–दुईथोक–विम्दा–वाख्रेजगत सडक स्तरोन्नतिका लागि आगामी आर्थिक वर्षमा एक करोड २५ लाख रुपैयाँ आउने भएको छ । सो सडक बहुवर्षीय योजनाअन्तर्गत १० करोड रुपैयाँ विनियोजन भएको छ । त्यसैगरी बेसीसहरकै उदिपुर–नयाँगाँउ सडक स्तरोन्नतिका लागि एक करोड १५ लाख रुपैयाँ विनियोजन भएको छ । सो सडक पनि बहुवर्षीय योजनाअन्तर्गत आठ करोड ७२ लाख रुपैयाँ विनियोजन भएको सडक हो ।
आगामी आर्थिक वर्षमा मध्यनेपाल नगरपालिकाअन्तर्गत भोर्लेटार, वांग्रे, नेटा मालिका मन्दिर सडकका लागि ५० लाख रुपैया विनियोजन भएको छ । सो सडक पनि बहुवर्षीय योजनाअन्तर्गत पाँच करोड रुपैयाँ विनियोजन भएको सडक हो ।
आगामी आर्थिक वर्षमा राइनास नगरपालिकाअन्तर्गत वगरगाँऊ–टुँडावगर–सडक र उपल्लोफाँट–ठुलोबगैंचा – पाडेवेशी – जुडिखेत सडकका लागि ८० लाख रुपैयाँ विनियोजन भएको छ । बहुवर्षीय योजनामा रहेको सो सडकका लागि १० करोड विनियोजन भएको छ ।
त्यसैगरी सुन्दरबजार नगरपालिकाअन्तर्गत भारती सदन लिंगेडाँडाहुँदै रामदी पेट्रोल पम्प मोटर बाटो स्तरोन्नतिका लागि पनि ८० लाख रुपैयाँ विनियोजन भएको छ ।
दूधपोखरी गाउँपालिकाअन्तर्गत लामागाँउ–जोर्ने–सामघडेरी सडक स्तरोन्नतिका लागि एक करोड ३० लाख रुपैयाँ विनियोजन भएको छ । बहुवर्षीय योजनाअन्तर्गत सो सडकका लागि नौ करोड रुपैयाँ विनियोजन भएको थियो । दूधपोखरीकै प्यारजुंङ्ग–पात्ले सडक स्तरोन्नतिका लागि पनि एक करोड ३० लाख रुपैयाँ विनियोजन भएको छ । बहुवर्षीय योजनामा रहेको सो सडकका लागि पनि नौ करोड बजेट विनियोजन भएको छ ।
यस्तै मस्र्याङ्दी गाउँपालिकाअन्तर्गत खुदी–सिउरुङ–स्यांगे सडक स्तरोन्नतिका लागि भने एक करोड ५२ लाख रुपैयाँ विनियोजन भएको छ ।
त्यसैगरी दोर्दी गाउँपालिकाअन्तर्गत नौथर–शेरा–तांजे सडक स्तरोन्नतिका लागि एक करोड १५ लाख रुपैयाँ विनियोजन भएको छ । दोर्दी अन्तर्गतकै ठाँटी–पिपल भञ्ज्याङ्ग–सल्लाबाट मोटरवाटो निर्माणका लागि पनि एक करोड १५ लाख रुपैयाँ विनियोजन भएको छ ।
