काठमाडौँ– सरकारकै प्रमुख एक घटक नेपाली कांग्रेसकै नेताले सत्ता टिकाउनका लागि रेशम चौधरीलाई आममाफी दिइएको बताएका छन् ।
कांग्रेस नेता डा. शेखर कोइरालाले प्रधानमन्त्री पुष्पकमल दाहाल प्रचण्डले सत्ता टिकाउनका लागि अदालतको आदेशविपरीत चौधरीलाई आममाफी दिने निर्णय गरेको आरोप लगाएका हुन् ।
आज कांग्रेस जिल्ला कार्य समिति, भक्तपुरले आयोजना गरेको एक कार्यक्रममा बोल्दै दण्डहिनतालाई प्रश्रय दिने गरी राष्ट्रपतिबाट तीनवटै तहको अदालतको आदेशविपरीत चौधरीलाई आममाफी दिने कुराले अन्ततः लोकतन्त्रलाई नै कमजोर बनाउने स्पष्ट पारे ।
नेता कोइरालाले आठजना प्रहरी र एक बालकको हत्या भएको त्यस्तो जगन्य अपराधका दोषीलाई आममाफी दिएको भन्दै उनले आक्रोशसमेत पोखे ।
सो अवसरमा उनले कांग्रेस कमजोर भएको हिन भावना लिएर नबस्न पनि पार्टीका नेता, कार्यकर्तालाई सचेत गराए ।
उनले जिल्ला निर्वाचन कार्यालयलाई जिल्ला प्रशासन कार्यालय मातहत राख्ने सरकारको निर्णयप्रति पनि आपत्ति जनाए ।
