काठमाडौँ– नेपाल मजदुर किसान पार्टी (नेमकिपा)का नेतासमेत रहेका सांसद प्रेम सुवालले प्रधानन्यायाधीश हरिकृष्ण कार्कीमाथि महाअभियोग लगाउनु पर्ने बताएका छन् ।
आज (आइतबार) प्रतिनिधि सभामा बोल्दै सांसद सुवालले यस्तो बताएका हुन् । उनले अहिलेका प्रधानन्यायाधीश हरिकृष्ण कार्कीले सरकारी जग्गा व्यक्तिको नाममा दर्ता गराउन भूमिका खेलेको भन्दै महाअभियोग लगाउन माग गरे ।
‘न्यायालय अहिले भद्रगोल छ । न्यायाधीशहरुले झगडीयाहरुसँग टेलिफोन गरेको उदाहरण बाहिर आएको छ । झगडीयासँग फोन गर्न मिल्द न्यायाधीशले ? र, न्यायाधीश र वकिल सिन्डिकेटमा चलिरहेको बाहिर आएको छ । अदालत स्वयम्ले सार्वजनिक जमिन व्यक्तिको नाममा दर्ता गर्दिने– छाया कम्प्लेक्स, ललिता निवास । सगरमाथा राष्ट्रिय निकुन्जको जग्गा व्यक्तिको नाममा कसरी दर्ता भयो ? न्यायालयको काम, न्यायालयको फैसलाले । त्यसकारण न्यायालयको फैसलालाई अनुगमन गर्नुपर्यो । यसमा कानुन मन्त्री अगाडि बढ्नु पर्यो । र, प्रधानन्यायाधीश (हरिकृष्ण कार्की) जीले महान्यायाधिवक्ता हुँदा सरकारी जग्गा व्यक्तिको हो भनेर दर्ता गरेको कुरा बाहिर आएको छ । यस्तो विषय सबै अख्तियार दुरुपयोग हो । संसदले महाअभियोग लगाउनु पर्छ,’ सांसद सुवालले भने ।
