काठमाडौँ– आईसीसी विश्वकप छनोट प्रतियोगीता अन्तर्गतको प्लेअफ खेलमा नेपालले यूएईलाई पराजित गरेको छ।
हरारेस्थित टाकासिंगा स्पोर्टस् क्लबमा १८२ रनको सामान्य लक्ष्य पछ्याउने क्रममा नेपालले ४० बाँकी रहँदै ७ विकेटको क्षतिमा यूएईलाई पराजित गरेको हो ।
आजको खेलमा अविजित रहेका दीपेन्द्रसिंह ऐरीले ७ चौका र २ छक्का प्रहार गर्दै ७९ रनको सर्वाधिक स्कोर गरे । उनलाई साथ दिएका सन्दीप लामिछानेले पनि २३ रनको पारी खेले । १२ रनमा पवेलियन फर्किएका गुलशन झासँग मिलेर दीपेन्द्रले ४२ रनको साझेदारी गरे । नेपालका लागि ओपनर कुशल भुर्तेलले ३५ रन बनाए ।अर्जुन साउद ५ बलमा १ रन बनाएको अवस्थामा पवेलियन फर्किए । पूर्वकप्तान ज्ञानेन्द्र मल्लले १३ रन बनाए । कप्तान रोहित पौडेल ४ रन बनाउँदा क्याच आउट हुन पुगे । भीम सार्की र आरिफ शेख व्यक्तिगत १–१ रनको साझेदारीमै आउट भए ।
नेपालका लागि करण केसी र सन्दीप लामिछानेले समान ३–३ विकेट लिए । नेपालका लागि प्रतिस जिसी, गुलशन झा र दीपेन्द्रसिंह एरीले व्यक्तिगत १–१ विकेट लिए ।
यूएईले ४६.५ बल खेल्दै सबै विकेटको क्षतिमा १८१ रन बनाएको थियो । यूएईका लागि कप्तान भ्रितिया अरबिन्दले सर्वाधिक ४४, रोहन मुस्ताफाले ३५ र वसिल हमिदले २९ रनको योगदान दिए । त्यसैगरी, ओपनर आर्यन शर्माले २८ रन जोड्न सफल भए ।
यूएईलाई प्लेअफमा पराजित गरेसँगै अब नेपालले सातौँ स्थानका लागि आयरल्यान्डसँग खेल्ने छ । शुक्रबार भएको पहिलो प्लेअफ खेलमा अमेरिकालाई हराउँदै आयरल्यान्डले यो खेलको विजेतासँग भेट पक्का गरिसकेको छ ।
यो खेलमा हार्ने टोली भने नवौँ स्थानका लागि अमेरिकासँग खेल्नेछ।
