काठमाडौँ– प्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले दिएको विवादास्पद अभिव्यक्तिको विरोधका कारण संसद्का दुवै सदन चल्न नसक्दा मिटरब्याजीहरुलाई कारबाही गर्न सरकारले ल्याएको अध्यादेश निष्क्रिय बनेको छ । 

यसअघि सरकारले मिटरब्याजलाई अनुचित लेनदेनका रुपमा कानुनी परिभाषा गरी त्यसलाई दण्डनीय हुने गरी व्यवस्था गर्न मौजुदा कानुनमा संशोधन गर्दै अध्यादेश जारी गरेको थियो । अध्यादेश जारी भएको ६० दिनभित्र कानूनबमोजिम प्रतिस्थापन विधेयक संसद्का दुवै सदनबाट पारित हुनुपर्छ । आजको प्रतिनिधिसभाको बैठकमा प्रतिस्थापन विधेयक पेश गर्ने कार्यसूची रहेको थियो ।  बैठक अवरुद्ध भएका कारण यसअघि ल्याइएको अध्यादेश नै स्वतः निष्क्रिय बनेको हो ।

अभिव्यक्तिका विषयमा आपत्ति जनाउँदै प्रमुख प्रतिपक्षी नेकपा (एमाले)सहित विपक्षी दलले अवरोध गरेपछि प्रतिनिधिसभाको आजको बैठक स्थगन भएको हो । सो विषयमा राष्ट्रियसभाको आजको पहिलो बैठक पनि स्थगन भएको छ । विरोधका कारण बुधबार रोकिएको राष्ट्रिय सभाको बैठक बिहीबार बस्ने गरी सारिएको छ । राष्ट्रिय सभाको बैठक बिहीबारसम्म सरेपछि अध्यादेश बुधबार राती नै निष्क्रिय हुनेछ ।

विवादास्पद अभिव्यक्तिका कारण प्रमुख प्रतिपक्षी दल एमालेले प्रधानमन्त्री ‘प्रचण्डले राजीनामा समेत दिनुपर्ने माग गरेका छन् । विपक्षी दलहरु रास्वपा र राप्रपाले पनि प्रधानमन्त्रीको अभिव्यक्तिको विरोध गरेका छन् ।

प्रधानमन्त्रीको विवादास्पद अभिव्यक्ति

प्रधानमन्त्री ‘प्रचण्ड’ले गत सोमबार व्यवसायी प्रितम सिंहले आफूलाई प्रधानमन्त्री बनाउन धेरै मिहिनेत गरेको र दिल्लीसमेत धाएको भन्दै विवादित अभिव्यक्ति दिएका थिए ।

प्रधानमन्त्री ‘प्रचण्ड’ले नेपालमा पहिलो पटक ट्रक ल्याएका सरदार समुदायका प्रितम सिंहमाथि किरणदीप सन्धुले लेखेको पुस्तक ‘रोड्स टु द भ्यालीः द लिगेसी अफ सरदार प्रितम सिंह इन नेपाल’ विमोचन कार्यक्रममा उक्त विवादास्पद अभिव्यक्ति दिएका थिए । सो कार्यक्रममा उनले भनेका थिए, ‘उहाँ (सिंह)ले एक पटक मलाई प्रधानमन्त्री बनाउन धेरै मिहिनेत गर्नुभयो । धेरैचोटि दिल्ली जानु पनि भयो । काठमाडौंमा नेताहरू–साथीहरूसँग लगातार छलफल गर्नुभयो ।’