काठमाडौँ–ठमेलको लर्ड अफ ड्रिंक्स (एलओडी) क्लब गएकी एक बालिकालाई बलात्कार गरेको अभियोग लागेका व्यक्तिले बालिकालाई उमेर पुगेकी युवती भनेपछि घटनाले नयाँ मोड लिएको छ ।
एलओडी क्लब गएकी एक जना नाबालिका बलात्कार गरेको आरोपमा प्रहरीले पक्राउ गरेका सुदनबहादुर कोइरालाले एक बालिकालाई बलात्कार गरेको आरोप लागेको हो ।
कोइरालालाई जेठ ३० गते एलओडी क्लब गएकी १६ बर्षे बालिकालाई ललितपुर लगेर बलात्कार गरेको आरोप लागेको छ । उनी पोखरा घर भइ ललितपुरको बागडोल बस्ने ५० वर्षीय सुदनबहादुर कोइराला हुन् ।
प्रहरीले दिएको जानकारी अनुसार जेठ३१ गते बिहान बागडोलस्थित कार्यालयमा बलात्कृत भएको भन्दै पीडितले प्रहरी कहाँ किटानी जाहेरी दिएकी छिन् ।
जाहेरी परेपछि कोइरालालाई पक्राउ गरेर प्रहरीले अनुसन्धान थालेको थियो । बयानका क्रममा उनले पीडित उमेर पुगेको युवती भएको दाबी गरेका थिए । क्लबमा प्रवेश गर्ने व्यक्ति बालिका नहुने उनको दाबी थियो ।
‘उमेर नपुगेको केटीले क्लबमा प्रवेश नै पाउँदैन, त्यसैले ऊ नाबालिग होइन, कोइरालाले बयानमा भनेका छन् ।
उनको यो बयानपछि प्रहरीले एलओडीका सञ्चालकलाई पनि छानबिनको दायरामा ल्याएको छ । नाबालिगलाई एलओडी प्रवेश दिएको विषयलाई लिएर प्रहरीले क्लबका सञ्चालक रुदिलवल्लव श्रेष्ठ र राजुसिंह सुवालमाथि अनुसन्धान थालेको हो । उनीहरुविरुद्ध जिल्ला अदालत, ललितपुरबाट पक्राउ पूर्जी लिएर प्रहरीले खोजी गरिरहेको छ ।
