काठमाडौँ - आईसीसी एक दिवसीय विश्वकप छनोटअन्तर्गत सुपर सिक्सको अन्तिम खेलमा श्रीलङ्काले वेष्ट इण्डिजमाथि ८ विकेटको शानदार जित निकालेको छ।
जितका लागि वेष्ट इण्डिजले दिएको २४४ रनको लक्ष्य श्रीलङ्काले ४४.२ ओभरमा मात्र २ विकेटको क्षतिमा पूरा गर्यो। श्रीलङ्काको जितमा विस्फोटक ब्याटिङ गरेका पथुम निसानकाले सर्वाधिक १०४ रनको शतकीय पारी खेले।
दिमुथ करुणारत्नेले ८३ रन जोडे। कुशल मेन्डिसले अविजित ३४ रन जोडे। त्यसअघि जिम्बाबेको हरारे स्पोर्टस् क्लबमा टस हारेर पहिले ब्याटिङ थालेको वेष्ट इण्डिज ४८.१ ओभरमा अलआउट हुँदै २४३ रनमा समेटियो।
वेष्ट इण्डिजका लागि केसी कार्टीले सर्वाधिक ८७ रनको योगदान गरे। जोन्सन चार्ल्सले ३९ तथा रोमारियो शेफर्डले २६ रनको योगदान गरे। केभिन सिन्क्लेयरले २५ तथा निकोलस पुरनले १४ रन जोडे। बलिङतर्फ महेश थेक्षानाले सर्वाधिक चार तथा दुषण हेमन्थले दुई विकेट लिए।
यो जितसँगै श्रीलङ्काले विश्वकप छनोटमा अपराजित यात्रा कायमै राखेको छ। छनोट चरणमा खेलेका पाँचवटै खेल जित्ने श्रीलङ्का पहिलो टोली समेत बनेको छ। श्रीलङ्का र वेष्ट इण्डिजबीचको खेलसँगै सुपरसिक्स चरणका सबै खेल सकिएका छन्।
छनोट चरणमा सहभागी दश टोलीमध्ये नेदरल्याण्ड्स र श्रीलङ्काले विश्वकपमा स्थान बनाएका छन्। विश्वकप छनोटको फाइनलमा भोलि नेदरल्याण्ड्स र श्रीलंकाबीच प्रतिस्पर्धा हुनेछ।
