काठमाडौँ– नेपाली कांग्रेसले मंसिरमा महासमिति बैठक गर्ने निर्णय गरेको छ।
सानेपास्थित पार्टी कार्यालयमा बसेको केन्द्रीय समिति बैठकले आगामी मंसिर ११, १२ र १३ गते महासमिति बैठक गर्ने निर्णय गरेको हो ।
बैठकमा नीति अधिवेशन गर्ने माग उठे पनि अन्तमा महासमिति बैठक निर्णय निर्णय कांग्रेसले गरेको हो ।
पार्टीको १४औं महाधिवेशनले नीति अधिवेशन गर्ने निर्णय गरेको थियो । महामन्त्री विश्वप्रकाश शर्माले नीति अधिवेशनको साटो महासमिति बैठक गर्नुपर्ने भन्दै नीति अधिवेशनमार्फत गर्ने भनिएको काम गर्ने गरी मङ्सिर ११, १२ र १३ गते महासमिति बैठक गर्न सुझाव दिएका थिए ।
त्यस्तै पार्टीको सांगठनिक सुदृढीकरण गर्न साउन २० देखि ३० गतेसम्म आन्तरिक अभियान र भदौ १० देखि २४ गतेसम्म ‘समुदायमा कांग्रेस’ नामक राष्ट्रव्यापी अभियान चलाउने निर्णय बैठकले गरेको हो ।
बैठकमा केन्द्रीय सदस्यहरूले पार्टीभित्रको गुटउपगुट अन्त्य गर्नका लागि पार्टी सदस्य वितरणमा पारदर्शिता हुनुपर्ने धारणा राखे । केन्द्रीय सदस्य चित्रालेखा यादवले महिला नेत्रीले पार्टीमा दिएको योगदानको चर्चा गर्दै दिवङ्गत भइसकेका महिला नेत्रीहरूको योगदानलाई पार्टीले सम्मान गर्नुपर्नेमा जोड दिइन् ।
पार्टी केन्द्रीय सदस्य डा मीनेन्द्र रिजाल, रामहरि खतिवडा र अर्जुननरसिंह केसीले पार्टीभित्रको गुट–उपगुट अन्त्य गर्नुपर्नेमा जोड दिए ।
