काठमाडाैं - नेपाली लेग स्पिनर सन्दीप लामिछानेसम्मिलित सर्रे जग्वार्स ग्लोबल टी–२० क्यानडाको क्वालिफायरमा प्रवेश गरेको छ।
गएराति सम्पन्न खेलमा मिसिसौगा प्यान्थर्सलाई ८ विकेटले हराउँदै जग्वार्स अंक तालिकाको शीर्ष स्थानमा रहँदै क्वालिफायरमा प्रवेश गरेको हो।
लिग चरणको अन्तिम खेलमा प्यान्थर्सले दिएको ५७ रनको झिनो लक्ष्य जग्वार्सले ९ ओभरमा २ विकेट गुमाएर पूरा गर्यो।
उसका लागि मोहम्मद हरिसले २३ बलमा ६ चौका र १ छक्कासहित अविजित ३७ रन बनाए। यस्तै, लिटन दासले १०, कप्तान इफ्तिखार अहमदले अविजित ७ र जतिन्दर सिंहले २ रन जोडे।
प्यान्थर्सका लागि सेसिल परवेज र उस्मान कादिरले १/१ विकेट लिए। त्यसअघि ब्राम्पटनमा टस हारेर ब्याटिङको निम्तो पाएको पान्थर्स १४.३ ओभरमा ५६ रनमै अलआउट भयो। उसका लागि श्रेयस मोभाले १७ र निखिल दत्तले १० रन बनाए । बाँकी ब्याटरले भने दोहोरो अंकमा समेत रन जोड्न सकेनन्।
प्यान्थर्सलाई सस्तैमा समेट्नेक्रममा सन्दीपले ४ ओभरमा मात्र ६ रन दिएर ३ विकेट लिए।
