वासिङ्टन डीसी — संयुक्त राज्य अमेरिकाले अंल्पसंङ्ख्यक समुदाय उइघुरलाई जवरजस्ती श्रम शोषण गरेको आरोप दुई चिनियाँ कम्पनीहरूलाई कालोसूचीमा राखेको छ । 

 यूएस डिपार्टमेन्ट अफ होमल्यान्ड सेक्युरिटी (डीएचएस) ले एक विज्ञप्ति जारी गर्दै ब्याट्री निर्माता कम्पनी क्यामल ग्रुप र मसला र एक्स्ट्र्याक्ट निर्माता चेन्गुआंग बायोटेक ग्रुपलाई बुधवारदेखि देशमा उत्पादन विक्री गर्न अनुमति नदिने घोषणा गरेको छ।

डीएचएसले अमेरिकी आपूर्ति श्रृंखलामा जबरजस्ती श्रम अभ्यासको प्रयोगलाई हटाउन र सिन्जियाङमा उइघुरहरू र अन्य धार्मिक र जातीय अल्पसंख्यक समूहहरू विरुद्ध भइरहेको नरसंहार र मानवता विरुद्धको अपराधको लागि जवाफदेहीता बढाउन नयाँ प्रवर्तन कार्यहरू घोषणा गरेको छ। 

‘हामी हाम्रा सबै साझेदारहरूसँग सिनजियाङबाट जबर्जस्ती श्रममा बनाइएका सामानहरूलाई अमेरिकी वाणिज्यबाट बाहिर राख्नका लागि वैध व्यापारको प्रवाहलाई सहजीकरण गर्न जारी राख्नेछौं।’, विज्ञप्तिमा भनिएको छ । याेसँगै अमेरिकाले कालोसूचीमा राखेको चिनियाँ कम्पनीको संङ्ख्या २४ पुगेको छ । 

अल जजीराका अनुसार बेइजिङ र वासिङ्टनबीचको सम्बन्धमा द्वन्द्व निम्त्याउने धेरै मुद्दाहरूमध्ये यो पनि एक हो, उइघुरहरूप्रति चीनको व्यवहारलाई लिएर सम्बन्ध हालैका समयमा तिक्तता आएको छ । तर बेइजिङले यी आरोपहरूलाई अस्वीकार गर्दै उइघुर र अन्य अल्पसंख्यकहरूप्रति आफ्नो नीतिहरू कायम राख्नुपर्ने दाबी गर्दै ‘चरमपन्थ’ विरुद्ध लड्न आग्रह गरेको छ। 

राष्ट्रपति जो बिडेनले डिसेम्बर २०२१ मा उइघुर जबरजस्ती श्रम रोकथाम ऐन मा हस्ताक्षर गरेपछि, सिनजियाङमा वा उइघुरमाथि भएको जबरजस्ती श्रम शोषण गर्ने  कम्पनीबाट उत्पादित सामान अमेरिकामा आयात गर्न गैरकानुनी भएको छ ।