काठमाडौं - सन्दीप लामिछाने आवद्ध रहेकाे सर्रे जगुआर्स ग्लोबल टी २० को फाइनलमा पुगेको छ।
गए राति भएको पहिलो क्वालिफायरमा भ्यानकुभर नाइट्सलाई ३८ रनले हराउँदै सर्रे उपाधि नजिक पुगेको हो ।
टस हारेर पहिले ब्याटिङ गरी निर्धारित २० ओभरमा ९ विकेट गुमाउँदै १३९ रन बनाएको सर्रेले भ्यानकुभरलाई १६.१ ओेभरमा १०२ रनमै अलआउट गर्दै सहज जित हासिल गर्यो । भ्यानकुभरका लागि फ्याबियन अलेनले सर्वाधिक २७ रन बनाए ।
सर्रेका लागि म्याथ्यु फोर्डले घातक बलिङ गर्दै २.४ ओभरमा १६ रन खर्चेर ४ विकेट लिए । सन्दीपले ३ ओेभरमा १५ रन खर्चेर एक विकेट लिए । यस्तै इलिमिनेटरमा दीपेन्द्र सिंह ऐरीको मान्ट्रियल टाइगरले ब्राम्प्टन उल्भ्सविरूद्ध सहज जित निकाल्दै दोस्रो प्लेअफमा स्थान बनाएको छ ।
टस हारेर पहिले ब्याटिङ गरेको उल्भ्स निर्धारित २० ओभरमा १०४ रनमा नै अलआउट भयो । टाइगर्सका लागि कार्लोस ब्रेथह्वाइट र आयन फैजल खानले २–२ विकेट लिए । दीपेन्द्रले एक ओेभरमा ६ रन खर्चेर १ विकेट लिए ।
झिनो लक्ष मोन्ट्रियलले १४२ ओभरमा मात्र १ विकेट गुमाएर हासिल गर्यो । मोन्ट्रियलका लागि कप्तान क्रिस लिनले ४७ बलमा ६३ रन बनाए ।मोन्ट्रियलले आज दोस्रो क्वालिफायरमा भ्यानकुभर नाइट्ससँग भिड्नेछन । जित हासिल गरेमा भोलि उपाधिका लागि सन्दीपको सर्रे जगुअर्स र दीपेन्द्रको मोन्ट्रियल आपसमा भिड्नेछन् ।
