काठमाडौँ– प्रतिनिधिसभाको बैठक मंगलबारसम्मका लागि स्थगित गरिएको छ । 

सोमबार बस्ने भनिएको बैठक संसद सचिवालयले सूचना टाँस गरेर मंगलबार दिउँसो ३ बजेसम्मका लागि बैठक स्थगित गरिएको जनाएको हो । 

सुन तस्करी प्रकरणमा उच्चस्तरीय छानबिन समिति गठन गर्नुपर्ने माग गर्दै एमालेका सांसदहरूले विरोध जनाएपछि संसद्‍ अवरुद्ध हुँदै आएको छ । सदनको अवरोध खोल्ने बिषयमा शीर्ष दलहरुबीच सोमबार भएको छलफल निष्कर्षमा पुग्न नसकेपछि सदन चल्न नसकेको हो । 

मंगलबार बिहान साढे १० बजे प्रधानमन्त्री निवास बालुवाटारमा सभामुखको समेत उपस्थितिमा बस्ने गरी शीर्ष नेताहरुको बैठक बस्ने तय भएको एमाले सचेतक महेश वर्तौलाले जानकारी दिए । उनले सुन प्रकरणमा उच्चस्तरीय छानविन समिति गठन गर्ने बिषयमा प्रधानमन्त्रीले समय मागेका कारण बैठक स्थगीत भएको बताए । सचेतक वर्तौलाले सुन प्रकरणको अनुसन्धानमा सहयोग गर्नकै लागि उच्चस्तरीय छानबिन समिति गठन गर्नुपर्नेमा एमालेको जोड रहेको जिकिर गरे । उनले सदनमा गृहमन्त्री अर्थमन्त्रीले जवाफ दिनका लागि एमाले सदनमा विरोध नगर्ने बताए ।

त्यस्तै, नेकपा माओवादी केन्द्रका नेता बर्षमान पुनले दलहरुबीचको छलफल सकारात्मक रुपमा अघि बढेको बताए । उनले सरकारको निकायले अनुसन्धान गर्दा अर्को समिति गठन गर्दा छानविन प्रभाविन हुने देखिएकाले उच्चस्तरीय छानबिन समिति गठनको आवश्यकता नरहेको जिकिर गरे । सरकारको छानविनमा शंका उपशंका गर्न आवश्यक नरहेको उनको भनाइ छ । 

त्यस्तै, रास्वपा प्रमुख सचेतक सन्तोष परियारले सत्तापक्ष र प्रतिपक्षीको लडाईका कारण सदनलाई लामोसमयसम्म बन्दी बनाउन नहुने भन्दै छिटै सहमतिमा पुग्नुपर्ने बताउनुभयो । उहाले सदन जनताको भएपनि लामो समय अवरुद्ध हुदा जनताको मुद्दा उठाउन नसकिएको जिकिर गरे । 

सुन तस्करी प्रकरणमा उच्चस्तरीय छानबिन समिति गठन गर्ने बिषयमा सत्तापक्ष र प्रतिपक्षीबीच सहमति जुट्न नसक्दा संसद प्रभावित भइरहेको छ ।