काठमाडौं – एसिया कप खेल्न क्रिकेटर सन्दीप लामिछाने पाकिस्तान प्रस्थान गरेका छन् । लामिछानेलाई राष्ट्रिय खेलकुद परिषद्का सदस्य सचिव टंकलाल घिसिङलगायतले विदाई गरे ।
सञ्चारकर्मीहरुसँग कुराकानी गर्दै सन्दीपले एसिया कप खेलका लागि आफू फिट रहेको बताए । जीवनको कठिन समय भएपनि आफूले सकेको अभ्यास गरेको भन्दै उनले भने, ‘खेल्नका लागि म तयार छु । आशा छ, एसिया कममा राम्रो गर्ने छौं ।’
एशियाकपमा नेपालले पाकिस्तान र भारतसँग खेल्नेछ । बुधबार उद्घाटन खेलमा नेपाल र पाकिस्तान भिड्दैछन् । सन्दीपले एशिया कपका खेलहरूलाई निकै महत्वका साथ लिएको बताए । ‘यो खुसीको एउटा पर्व जस्तै हो किनभने हामीले सधैं यस्तो टिमहरुसँग खेल्न पाउँदैनौं,’ उनले भने ।
बलात्कार मुद्दा खेपिरहेका सन्दीपको आइतबार पेशी थियो । तर, उक्त मुद्दा 'हेर्न नभ्याइने'मा पर्यो । अदालतले अर्को पेशी २१ भदौमा तोकेको छ ।
