काठमाडौं – नेपाल र भारतबीचको क्रिकेट म्याचका दौरान ‘कुटुमा कुटु’ बोलको चर्चित गीत मैदानमा बजाइयो । भारतीय ब्याट्सम्यान विराट कोहली यो गीत बज्न थालेपछि मैदानमै नाचे ।
अहिले विराटका फ्यानहरु युट्युबमा यस गीतमा झुम्मिएका छन् । उनीहरुले विराटको डान्स हेरेपछि गीत खोज्दै सुन्न थालेको प्रतिक्रिया दिएका छन् । युट्युबमा प्रतिक्रिया दिदैं उनीहरुले गीत निकै मन परेको जनाएका छन् ।
यो गीत युट्बुयमा सर्वाधिक हेरिएको नेपाली गीत हो । १९ करोड २० लाखभन्दा धेरै पटक यो गीतलाई युट्युबमा हेरिएको भनेर हाइलाइट्स नेपालले ‘थम्बनेल’ मा उल्लेख गरेको छ ।
अहिले यो संख्या अझै बढेर १९ करोड ३० लाखभन्दा बढी पुगेको छ । कमेन्ट सेक्सनमा पछिल्लो समय प्रतिक्रिया दिनेहरुले आफु कोहलीको प्रशंसक रहेको बताइरहेका छन् ।
भारतीय मिडियाहरूले पनि यस गीतको चर्चा गरिरहेका छन् । राजनराज सिवाकोटीको शब्द र संगीत रहेको गीतमा सिवाकोटीसँगै मेलिना राई र राजन ईशानको पनि आवाज छ ।
दुई रूपैयाँ फिल्मको यस गीतको भिडियोमा स्वस्तिमा खड्का, निश्चल बस्नेत, आसिफ शाह, बुद्धि तामाङलगायत कलाकार देखिएका छन् ।
