काठमाडौँ– प्रसिद्ध अमेरिकी पत्रिका टाइमले काठमाडौँ महानगरपालिकाका मेयर बालेन्द्र शाह (बालेन)लाई यस वर्षका एक सय उदीयमान व्यक्ति ‘टाइम १०० नेक्स्ट’ को सूचीमा राखेको छ ।
प्रत्येक वर्ष विश्वभरिबाट राजनीति सहित स्वास्थ्य, वातावरण, खेल, व्यवसायजस्ता विभिन्न विधाका उदीयमान व्यक्तिहरू छानेर टाइमले ‘टाइम १०० नेक्स्ट’ को सूचीमा राख्ने गर्दछ । सूचीमा उनीहरूको कामको चर्चासहित विवरण प्रकाशित गरिन्छ ।
‘टाइम १०० नेक्स्ट’ सूचीमा काठमाण्डूका युवा मेयरको नाम सार्वजनिक भए लगत्तै सामाजिक सञ्जालमा प्रयोगकर्ताहरूले यसबारे विभिन्न चर्चा परिचर्चा गरिरहेका छन् ।
उनलाई टाइमले ‘२०२३ टइम १०० नेक्स्ट’ सूचीमा समावेश गर्दै उनले गत स्थानीय तहको निर्वाचनमा हासिल गरेको अप्रत्याशित जीतको चर्चा गरेको छ । स्वतन्त्र उम्मेदवारी दिएका ३३ वर्षका शाहले ‘सामाजिक सञ्जालको प्रयोग गरेर मतदाताको निराशाको अवसर छोप्दै ‘बालेन प्रभाव’ सिर्जना गरेको’ टाइमले उल्लेख गरेको छ ।
बीबीसी का अनसार नेपालको ३८५ जना स्वतन्त्र उम्मेदवारले स्थापित राजनीतिज्ञहरूलाई हराउन सफल भएको समेत टाइमले उल्लेख गरेको छ।
यसअघि द न्यू योर्क टाइम्सले गत मे महिनामा बालेनबारे एउटा लामो सामग्री प्रकाशित गरेको थियो । टाइमको १०० नेक्स्ट सूचीमा पर्नुलाई ठूलो उपलब्धि भन्दै धेरैजसोले सामाजिक सञ्जालमार्फत मेयर बालेनलाई बधाई दिइरहेका छन् ।
