बङ्गलादेशको डिफेन्स सर्भिसका शिक्षार्थीहरुद्वारा सैनिक कमाण्ड तथा स्टाफ कलेज भ्रमण
काठमाडौँ– बङ्गलादेशको मिरपुरस्थित ‘डिफेन्स सर्भिस कमाण्ड एण्ड स्टाफ कलेज’का शिक्षार्थीहरूले शिवपुरीस्थित सैनिक कमाण्ड तथा स्टाफ कलेजको भ्रमण गरेका छन् ।
‘डिफेन्स सर्भिस कमाण्ड एण्ड स्टाफ कोर्ष–२०२३’मा सहभागी शिक्षार्थीहरूले आज शिवपुरीस्थित सैनिक कमाण्ड तथा स्टाफ कलेजको भ्रमण गरेका हुन् ।
उक्त कलेजका वरिष्ठ प्रशिक्षक कर्नल मोहम्मद जाहिद हुसेन (पिएससी)को नेतृत्वमा गत शनिबार नेपालको ७ दिने अध्ययन भ्रमणका आएको ३२ सदस्यीय भ्रमणदलले काठमाडौं उपत्यका एवं पोखराको भ्रमणसमेत गन नेपाली सेनाको जनसम्पर्क तथा सूचना निर्देशनालयले जनाएको छ ।
नेपाली सेनाका अनुसार विभिन्न मित्रराष्ट्रहरुमा सञ्चालित यस किसिमको तालिममा सहभागी शिक्षार्थीहरूले विभिन्न मुलुकहरूको भ्रमण गर्ने प्रचलन रही आएको छ ।
यस किसिमको अध्ययन भ्रमणबाट सामूहिक चासोका विषयमा ज्ञान र अनुभवको आदानप्रदान एवं सम्बध्द मुलुकहरूसँगको सैनिक सम्बन्धलाई थप सुमधुर बनाउन मद्दत पुग्नुका साथै नेपालको पर्यटन प्रवर्द्धनमा समेत टेवा पुग्ने विश्वास नेपाली सेनाले लिएको छ ।
