ओस्लो– नर्वेका प्रधानमन्त्री जोनास गाहर स्टोरले सोमबार विदेशमन्त्री एनिकेन हुइटफेल्टलाई शेयर खरिद प्रकरणमा बर्खास्त गरेका छन् ।
लामो समयदेखि स्टोरकी संरक्षक मानिएकी हुइटफेल्टले सन् २०२१ मा विदेशमन्त्री बनेपछि आफ्ना पतिले ‘पहिले विश्वास गरेभन्दा धेरै ठूलो परिमाणमा’ सेयर किनेको स्वीकारेकी थिइन् ।
युक्रेनमा जारी युद्धबीच नर्वेली राज्यसम्झौताबाट लाभ उठाएको रक्षा समूह कोङ्सबर्ग ग्रुपमा गरिएको लगानीले सम्भावित स्वार्थको द्वन्द्वबारे प्रश्न उठाएको थियो । “मेरो निष्पक्षतासँग जोडिएको गल्तीका लागि म क्षमा याचना गर्दछु,” ५३ वर्षीय विदेशमन्त्रीले भनिन् ।
संसदीय समितिले यस विषयमा छानबिन सुरु गरेको छ । यद्यपि प्रहरीले भने अनुसन्धानको आवश्यकता नरहेको बताएको छ ।
प्रधानमन्त्री स्टोरले पत्रकारहरूसँग कुरा गर्दै भने, “शेयर खरिद र बिक्रीको मुद्दा उहाँको बहिर्गमनको एक कारण हो तर यो एक मात्र होइन, यो एक ‘कठिन निर्णय’ थियो ।
प्रधानमन्त्रीले सेप्टेम्बरको सुरुमा भएको स्थानीय चुनावमा आफ्नो लेबर पार्टीको खराब प्रदर्शनले देखाएको मतदाताको अविश्वासले पनि भूमिका खेलेको बताए । “म एनिकेनको सन्दर्भमा के भन्न सक्छस भने आफ्नो पतिको शेयर व्यापारको बारेमा उहाँलाई थाहा थिएन“, उनले भने ।
सन् २०११–२०१२ मा जलवायु तथा वातावरण मन्त्रीको रूपमा काम गरेका एस्पेन बार्थ आइडेले हुइटफेल्टको स्थानमा जिम्मेवारी सम्हाल्ने भएका छन् ।
ह्युइटफेल्ट प्रकरण सार्वजनिक भएपछि कन्जरभेटिभ पार्टीका विपक्षी नेता एर्ना सोलबर्गका पतिले सन् २०१३ देखि २०२१ सम्म प्रधानमन्त्री हुँदा हजारौं शेयर कारोबार गरेको खुलासा भएको थियो ।
राजनीतिक विश्लेषकहरूका अनुसार, हुइटफेल्टको बहिर्गमनले स्टोरलाई सोलबर्गविरुद्ध आक्रमणमा जान सजिलो बनाउने र सन् २०२५ को चुनावमा सत्ता पुनः प्राप्त गर्ने उनको सम्भावनालाई कम गर्ने अपेक्षा गरिएको छ । स्टोरले ती दाबीहरू अस्वीकार गरेका छन् ।
