काठमाडौँ– नेकपा एकीकृत समाजवादीका अध्यक्ष माधव कुमार नेपालले मुलुकको शान्ति प्रक्रियाका बारेमा राष्ट्रसंघका महासचिव एन्टोनियो गुटेरेसले प्रसंसा गर्नु नेपालका लागि गौरवको बिषय भएको बताएका छन् ।

मंगलबार संसद भवन नयाँ बानेश्वरमा सञ्चारकर्मीसंग कुरा गर्दै अध्यक्ष नेपालले खासगरि शान्ति प्रक्रिया, संक्रमणकालीन न्यायसंग जोडिएको बिषयमा नेपालकै पहलकदमीमा अघि बढाउने र समाधान गर्ने बिषयमा राष्ट्रसंघका महासचिवले प्रसंसा गर्नु नेपालका लागि गौरवको बिषय भएको बताएका हुन् ।

त्यस्तै, जलवायु परिवर्तनका कारण नेपालमा परेको असरलाई विश्वसामू उठाउने बिषय पनि निकै सकारात्मक रहेको उनले बताए । उनले सम्पन्न देशले जलवायु परिवर्तनको असरको प्रभावको जिम्मा लिनुपर्ने, विश्व शान्तिका लागि नेपालको भूमिकाको प्रसंसा हुनु खुसीको कुरा भएको जिकिर गरे ।

त्यस्तै, नेपाली कांग्रेसका मुख्य सचेतक रमेश लेखकले राष्ट्रसंघका महासचिवले संसदमा गर्नुभएको संवोधनले नेपाललाई विश्वसामू थप उजागर गर्न मद्धत पुग्ने बताए । संविधान निर्माण, शान्तिप्रक्रिया लगाएतमा राष्ट्रसंघका महासचिवले गरेको प्रसंसाले अन्तराष्ट्रिय जगतमा नेपाललाई उपलव्धी हासिल गर्न सहज हुने उनले बताए ।

त्यस्तै, माओवादी केन्द्रका नेता बर्षमान पुनले राष्ट्रसंघका महासचिवको सम्बोधनले नेपालको मौलिकतामा शान्तिप्रक्रिया अघि बढाउन सहज हुने र आगामी दिनमा शान्तिप्रक्रिया टुङ्गाउन प्रोत्साहित गरेको बताए ।

यस्तै उनले जलवायु परिवर्तनले नेपाललाई पारेको असर विश्वमा जानकारी गराउन राष्ट्रसंघका महासचिवको सम्बोधन उल्लेखनीय रहेको धारणा राखे ।