काठमाडौं– मूलधारको राजनीतिका मुख्य नेता अबको जनमतसँग त्रसित भई सामूहिक बैठक बसिरहेका बेला ति दलहरूबाट मन्त्री बनेकाले पनि लोक रिझ्याँईको कामभन्दा पनि लोकप्रिय भएकाहरूको जनमत आफूकेन्द्रित बन्ने निर्णयको प्रचार थालेका छन् ।

यस्तो प्रचारमा लागेका छन् माओवादी नेता तथा संस्कृति, पर्यटन तथा नागरिक उड्डयनमन्त्री सुदन किराँती । 

धरान उपमहानगरपालिकाका मेयर हर्क साम्पाङले धरानमा विमानस्थल बनाउनका लागि संघीय सरकारलाई लेखेको पत्राअनुसार काम अघि बढेको किराँतीले घोषणा गरेका छन् । 

जबकि, यो काम हिसिला यमी मन्त्री हुँदा नै अगाडि बढेको दाबी गरिएको थियो । यमी त्यसबेला माओवादीकै नेत्री थिइन् ।

यो प्रक्रिया अघि नबढेपछि हर्क साम्पाङ सामाजिक सञ्जालमा बारम्बार मन्त्री किराँतीले काम नबढाएको भनी पत्र सार्वजनिक गर्ने, स्ट्याटस लेख्ने काम गरेका थिए । आलोचना बढ्ने त्रासले किराँतीले प्रक्रिया अघि बढाउन भनेको सामाजिक सञ्जालमा लेखेका थिए ।

साम्पाङले किराँतीका नाममा पत्रसमेत लेखेका थिए ।

‘धरानमा विमानस्थल निर्माण अध्ययन समिति तत्काल गठन गर्न नागरिक उड्डयन महानिर्देशकलाई निर्देशन गरिएको छ’ भनी मन्त्री किराँतीले सामाजिक सञ्जालमा लेखेका थिए । त्यसअघि साम्पाङले बारम्बार दबाब मात्र दिएका थिएनन्, नगरपालिकाको लेटरहेडको पत्र नै सार्वजनिक गरिदिए । 

पत्र यस्तो छ

साम्पाङ सामाजिक सञ्जालमा सक्रिय मात्र छैनन्, उनका समर्थक पनि निक्कै आक्रामक छन् । मन्त्री किराँती यहि कारणले पनि आलोचित हुने त्रासले लोक रिझ्याँईमा भन्दा साम्पाङ रिझ्याँईमा सक्रिय देखिए । 

आन्तरिक विमानस्थलहरू विमान अभावका कारण भटाभट बन्द भइरहेका बेला साम्पाङले विकासको निम्ति लोकप्रियता कमाउनका लागि निर्णय गरेका थिए । विमानस्थल बने पनि विमान उडान नभए त्यसको दोष संघीय सरकारले नै लिनुपर्छ तर लोकप्रियताचाहिँ साम्पाङको हातमा जान्छ । 

धरानमा विमानस्थल बनाउनु त्यहाँका जनताको चाहना भए पनि त्यसको व्यवस्थापनको पूर्वतयारी कस्तो हुने भन्नेचाहिँ निर्णित छैन । धरानबाट ३९ किलोमिटरमा रहेको बिराटनगरस्थित विमानस्थललाई नै अझ व्यवस्थित बनाउन नसकिरहेको अवस्थामा धरानमा विमानस्थल निर्माण कहिले सम्पन्न हुने भन्ने पनि पक्का नहुने उड्डयन प्राधिकरणका अधिकारीहरू बताउँछन् । 

नेपालमा अहिले पनि ५३ वटा विमानस्थल छन् । जहाँ २० वटा त बन्द नै छन् । उच्च अधिकारी भन्छन्, ‘विमान छैनन्, विमानस्थल सञ्चालनमा कर्मचारीदेखिका खर्च, प्राधिकरणको खर्च बढ्छ। बन्द भएका नै खुलाउन सकेपनि ठूलो काम हुन्छ। नयाँ भौतिक संरचना खडा गर्न खर्च त लाग्छ नै ।’

तर, विमानस्थलबारे नयाँ प्रकारको राजनीति खाली लोकप्रियताका लागि मात्र भएको जस्तो देखिन्छ । यसैपनि स्वतन्त्र उम्मेदवारले स्थानीय तह जितेपछि संघीय सरकारसँग टसल त परेकै छ । 

संघीय सरकारमा जिम्मेवारी लिएकालाई त्यो टसल छल्न निक्कै कठिन भइरहेका विभिन्न उदाहरण छन् । साम्पाङ मात्र होइन, काठमाडौं महानगरपालिकाका मेयर बालेन साहले पनि धेरै पटक संघीय सरकारसँग टसल लिइसकेका छन् ।