सियोल– प्रजातान्त्रिक जनवादी गणतन्त्र कोरिया (उत्तर कोरिया)ले अन्तरकोरियाली सैन्य सम्झौताअन्तर्गत रोकिएका सबै सैन्य उपायहरू तत्काल लागु गर्ने बिहीबार घोषणा गरेको ‘कोरियन सेन्ट्रल न्यूज एजेन्सी (केसीएनए)’ ले जनाएको छ ।

दक्षिण कोरियाले सैन्य सीमाङ्कन रेखामा सशस्त्र द्वन्द्वको खतरा कम गर्न गरिएको सम्झौतालाई आंशिक रूपमा स्थगन गर्ने निर्णय गरेको एक दिनपछि उत्तर कोरियाको रक्षा मन्त्रालयले उक्त वक्तव्य जारी गरेको हो ।

वक्तव्यमा भनिएको छ, “यो भू–उपग्रह प्रक्षेपण आत्मरक्षाको अधिकार र सार्वभौमिकताको वैध र न्यायोचित अभ्याससँग सम्बन्धित एक कदम हो ।”

रक्षा मन्त्रालयले भनेको छ, “उत्तर कोरियाले जमीन, समुद्र र हवाईलगायत सबै क्षेत्रमा सैन्य तनाव र द्वन्द्व रोक्नका लागि चालिएका सैन्य कदमहरू फिर्ता लिनेछ र सैन्य सीमाङ्कन रेखा क्षेत्रमा थप शक्तिशाली सशस्त्र बल र नयाँ प्रकारको सैन्य उपकरण तैनाथ गर्नेछ ।”

दक्षिण कोरियाले सन् २०१८ मा उत्तर कोरियासँग भएको सैन्य सम्झौता आंशिक रुपमा स्थगन गर्ने निर्णय गरेको थियो ।